Stadiumi i qytetit në Prishtinë, duket më i shëmtuar një ditë pas ndeshjes finale të Kupës së Republikës së Kosovës, në të cilën Liria doli fituese karshi Vëllaznimit me rezultat 2:1.

Gjatë 15 minutave të para të lojës shtesë, adhuruesit e Vëllaznimit në shenjë pakënaqësie ndaj simpatizuesve të Prishtinës, Plisat, të cilët i kishin ardhur në ndihmë prizrenasve në tribunën qendrore, filluan sjelljet vandale. Ata fillimisht shqyen flamujt bardh e kaltër që ishin të vendosur në lindje dhe më pas filluan edhe demolimin e ulëseve, disa prej të cilave i hodhën në fushë. Afrim Muçiqi nënkryetar i FC Prishtina tha, se ajo që ka ndodhur në stadiumin e kryeqytetit është turp.

“Është një turp i madh ajo që ka ndodhur në stadium, janë shqyer rreth 100 flamuj të skuadrës dhe dhjetëra karrige janë demoluar”, ka thënë Muçiqi.

Ai shtoi se pret në ditët në vazhdim të kontaktoj me FFK dhe të krijohen komisione të përbashkëta për vlerësimin e dëmit.

“Ne presim që gjatë kësaj jave së bashku me FFK-në, e cila ishte organizatore e finales, të krijojmë komisionet e përbashkëta dhe të evidentojmë në përpikëri dëmin e shkaktuar”, nënvizoi nënkryetari prishtinas.

Edhe drejtuesit e institucionit më të lartë të futbollit, shprehen indinjatën e tyre për sjelljet e shikuesve. Eroll Salihu, sekretar i përgjithshëm i FFK-së tha se të gjitha obligimet ndaj stadiumit do të kryhen nga ata, të cilët ishin edhe organizator të ndeshjes. Ndërkohë, dënoi rëndë sjelljen e publikut.

“Ne do të krijojmë komisionin e përbashkët me klubin Prishtinës dhe do të kryejmë çdo obligim që na takon si organizator të asaj ndeshje”. Më pas Salihu premtoi se do të japin përgjegjësi të gjithë ata që i qiten hije të keqe një organizmi shumë të mirë.

“Organet e FFK-së, do të nxjerrin autorët të cilët e shkaktuan atë tollovi, dhe u munduan të prishin imazhin e finales. Iu premtoi se do të marrin dënimin e merituar”, ka thënë Salihu. Nga fillimi i takimit, krahas skuadrave në fushë, rivalitet i theksuar u vërejt edhe në tribuna. Si “arpaxhikët”, ashtu edhe “Kuqezinjtë e Jakovës”, nuk kursyen asnjë fjalë për të ofenduar apo fyer njëra tjetrën.

Situata filloi të dalë nga kontrolli gjatë vazhdimit të parë, kur tifozët kuqezi filluan të demolojnë ulëset në lindje, ndërkaq si pasoj e kësaj ata u larguan para kohe nga stadiumi për t’i lënë të vetmuar prizrenasit të festojnë trofeun e kupës.

Gjithçka nisi qetë e mirë, por ia që dikush në tribunën lindore u përkujdes që kjo festë sportive që tuboi mijëra adhurues e mbi të gjitha shumë struktura politike e sportive të vendit sikur që edhe vet presidenti i Republikës së Kosovës dr. Fatmir Sejdiu me shumë ministra, të mos vazhdojë me atë frymë sportive dhe kështu prishën imazhin e festës dhe të futbollit të Kosovës.

Forcat e rendit u detyruan ta zbrazin tribunën lindore dhe të privojnë nga të ndjekurit të lojës ata që edhe ashtu me ato sjelljet e tyre e merituan një gjë të tillë. Si do që të jetë ndeshja finale ndërmjet Vëllaznimit dhe Lirisë u përmbyllë pas vazhdimeve me rezultat 2:1 në të mirë të Lirisë.

T’i kthehemi rrjedhës së lojës. Ndeshja nisi me matjen e forcave të njërës palë dhe skuadrës tjetër. E para që rrezikoi portën e rivalit padyshim ka qenë skuadra e Lirisë, kur Buqaj nga 18 metra gjuajti pranë portës pikërisht në minutën e 21-të. Në minutën e 32-të Vëllaznimi kaloi në epërsi.

Një veprim i rrjedhshëm i gjakovarëve, kur Kasapi si me dorë e gjen Ertan Hasan në 16-shin e Lirisë dhe ky nga afërsia nuk e pati të vështirë të shënoi për epërsinë 1:0. Gëzim i madh ndër gjakovarët dhe adhuruesit “Kuqezinjtë e Jakovës”. Në pjesën e dytë të ndeshjes, Liria barazoi (1:1) pas tre minutave lojë. Evrogol që rrallëherë shihet në stadiumet tona nga futbollisti Alsit Tafili.

Ai nga 25 metra me maje të syrit ka vërejtur portierin Kushtrim Mushica që nuk ishte si duhet i pozicionuar në portë dhe ka befasuar me një gjuajtje sa të bukur aq edhe të saktë. Efendija në minutën 57-të nuk kishte fat, pasi me kokë gjuajti jashtë portës. Ndeshja në kohën e rregullt përfundoi me rezultat baras, 1:1. Në vazhdime dy herë nga 15 minuta, skuadra e Lirisë sulmojë vazhdimisht, por edhe Vëllaznimi pati rastet e veta. Në minutën e 95-të ndërprehet ndeshja për 15 minuta për shkak të sjelljeve të pahijshme të shikuesve gjakovarë dhe policia u detyruar me forcë t’i largojë nga stadiumi.

Futbollisti Alsit Tafili ka qenë trim i ndeshjes, i cili në minutën 112-të shfrytëzoi me dinakëri një harkim të kapitenit Krusha, duke e plasura topin në rrjetë dhe 2:1. Pas dy minutave lojë, gjakovarët patën rast ideal të barazojnë rezultatin, por fati ishte kundër tyre, kur Hasan nga afërsia gjuajti jashtë portës. Liria shënoi fitore me meritë dhe fitoi kupën e Republikës së Kosovës.

Presidenti i Kosovës, dr. Fatmir Sejdiu, ia dorëzoi kupën kapitenit Fitim Krusha. Pas ndeshjes, Behajdin Gjinali, kryetrajner i Lirisë, tha se janë të gëzuar me trofeun që e fituan.

“E fituam me plotë meritë trofeun. Luajtëm mirë, shfrytëzuam rastet dhe arritëm gjithë këtë mund ta finalizojmë me sukses. Me kupën që fituam shpërblyem gjitha ato investimet e kryesisë po ashtu edhe adhuruesit që na përkrahën”, tha Gjinali. Ndërkaq, Ajet Shosholli, deklaroi se fati nuk ishte në anën e tyre.

“Dëshmuam lojë të mirë, por fati nuk ishte në anën tonë. Ndeshja sikur të përfundonte me rezultat baras, do të ishte edhe reale, kështu që fituesi të vendosej me penallti ” ka thënë Shosholli.

Vëllaznimi-Liria 1:2 – 1:1 (1:0)

Stadiumi i qytetit, Prishtinë. Sikues: 7.000.

Gjyqatrë: P. Hasani, E. Baliqi, Z. Miranaj.

Shënues: Hasan Hasan (32’) për Vëlalznimin dhe Tafili (48’ e 112’) për Lirisn.

KV: Efendija, Hashani, Hasan (VË), Karahoda, Sulallari (LI).

Vëllaznimi: Mushica, Dulazeka (Juniku), Efendija, Hashani, Kasapi, Gashi, Sërmaxhaj, Preokupuca, Gjeraj, Milicaj dhe Hasan.

Liria: Memaj, Qarkagjiaj, Buqaj, Qakalli, Gjananoviq, Sulollari, Krusha, Mullalari, Tafili, Karahoda dhe Emra (Guci). /botasot

Kur kanë mbetur edhe disa ditë deri në fillim të kampionatit botërorë, Afrika e Jugut 2010, në Kosovë, adhuruesit e futbollit kanë mundësi të shohin edhe një ballafaqim interesant.

Këtë të diele në kryeqytet do të zhvillohet finalja e Kupës së Republikës së Kosovës ndërmjet rivalëve tradicional, Lirisë dhe Vëllaznimit. Njëri nga sulmuesit më të spikatur, prizrenasi Uliks Emra, me të pyetur rreth këtij takimi shprehet qartazi: “Kupën patjetër që do ta dërgojmë në Prizren”.

Emra Lirisë iu bashkua në pranverë, shprehet të jetë shumë i sigurt për suksesin e skuadrës me të cilën iu bashkua në stinorin pranveror.

“Liria këtë vit ka zhvilluar një edicion të mirë, por synimi i ynë nga fillimi ka qenë trofeu i Kupës, dhe besoj që me fitore do ta kurorëzojmë një sukses të madh”. Liria në këtë edicion u paraqit mjaft e rrezikshme, dhe disa javë pa përfunduar kampionati ishte e renditur në pozitën e dytë të renditjes, por papritur filloi rënia e rezultateve të mira. Sulmuesi prizrenas, zbulon se “arpagjikët” janë përgatitur kryekëput vetëm për këtë garë.

“Katër javë pa përfunduar edicioni, edhe pse ishim në pozitën e dytë, ne u përqendruam vetëm në ndeshjet e Kupës, për këtë edhe trajneri ka inkuadruar në lojë futbollistë të rinj, në mënyrë që të kaliten për vitin e ardhshëm”.

Emra më parë ka mbrojtur ngjyrat e Vëllaznimit, me të cilën skuadër kishte humbur një finale të kupës, shprehet se arma më e fortë e gjakovarëve në këtë takim do të jenë adhuruesit tyre.

“‘Kuqezinjtë e Jakovës’, do të jenë arma më e fortë e Vëllaznimit, të cilët vazhdimisht janë në përkrahje të skuadrës së tyre, këtë e kam përjetuar sa kam qenë pjesë e skuadrës kuqezi”. Megjithatë, ai e vlerëson lartë edhe skuadrën e Vëllaznimit. “Ata kanë treguar lojëra të mira, sidomos, në pranverë”.

Emra përveç ballafaqimit me ish skuadrën e tij, në këtë takim do të përballet edhe me ish trajnerin tij, Ajet Shoshollin, me të cilën nuk i ka pas punët edhe aq mirë sa ishin së bashku në skuadrën e Prishtinës.

“Është e vërtet që sa ishim së bashku me trajnerin, Shosholli, unë jam ‘nxehur’ për gjatë 45 minutave dhe nuk jam inkuadruar fare në lojë, por përkundër mosmarrëveshjeve momentale unë kam respekt të madh ndaj tij, pasi është një trajner i mirë dhe sukseset e tij po vërehen edhe gjatë kësaj kohe te Vëllaznimi”.

Ky futbollist, në pjesën e parë të edicionit të sapo përfunduar, kishte mbrojtur ngjyrat e skuadrës së Trepçës, tani kampione e Kosovës, thotë që mos t’i ketë mbetur merak që u largua nga mitrovicasit.

“Edhe përkundër që Trepça u shpall kampione e Kosovës, unë nuk jam penduar në asnjë moment që jam larguar nga ‘xehetarët’, përkundër kësaj unë e ndie vetën pjesë të suksesit të tyre, pasi për një stinor kam djersitur atë fanellë”. Më pas Emra thotë se po të dalin fitues i kupës, atëherë për të do të ishte një sukses i jashtëzakonshëm, pasi e ndien vetën pjesëmarrës në suksesin e dy klubeve brenda një viti.

“Ky është një motiv më i madh për mua, pasi do të jetë një vit shumë i suksesshëm duke djersitur fanellat e dy skuadrave fituese”. Në fund, Emra fton të gjithë adhuruesit prizrenas që ti bashkohen Lirisë në Prishtinë. “Është koha e fundit kur presim ardhjen e shikuesve në mënyrë të organizuar që të na përkrahin në ndeshjen finale, pasi një gjë e tillë ka munguar gjatë edicionit”.

Liria edicionin e përfundoi në pozitën e 8 me 44 pikë të tubuara, ndërkaq Vëllaznimi e ka siguruar mbetjen në elitë vetëm pas fitores ndaj Besianës në ndeshjen e barazhit./ botasot

Futbollistët e Lirisë nga Prizreni dhe Vëllaznimit nga Gjakova do të takohen në finalen e kupës së Republikës së Kosovës në futboll. Liria eliminoi Besën e Pejës, ndërsa skuadra e Vëllaznimit Gjilanin.

Në ndeshjen e kthimit Liria arriti të shënoi fitore me rezultat 2:1 dhe barazimi i ndeshjes së parë 3:3 në Pejë i mundësoi shkuarjen në finale. Skuadra pejane u orvat me të gjitha forcat që të nxjerr fitore, por ka qenë e pamundur përballë Lirisë shumë të fortë.

Në pjesën e parë të takimit, prizrenasit udhëhoqën me rezultat 1:0 duke iu falënderuar golit të shënuar në minutën e 32-të nga futbollisti Astrit Tafili (32’).

Pjesa e parë e takimit përfundoi me rezultat 1:0 në favor të Lirisë. Në pjesën e dytë të takimit, pritej se Besa do të kthej rezultatin, por hasi në lojë shumë të mirë të prizrenasve. Futbollisti Fatih Karahoda në minutën e 77-të përmbysi edhe shpresat e fundit të pejanëve me golin që shënoi për epërsinë 2:0.

Pa kaluan një minutë lojë, pejanët ngushtojnë epërsinë në 2:1 nëpërmjet futbollistit Fitim Kasapit. Duhet theksuar se në këtë ndeshje të dyja ekipet e humbën nga një penallti, Krusha tek vendësit dhe Kasapi tek mysafirët. Prizrenasit shkojnë në finale, ndërsa pejanët eliminohen nga garat e kupës.

Në ndeshjen tjetër, skuadra e Vëllaznimit para shikuesve të vet në Gjakovë shënoi fitore me rezultat 2:1 ndaj Gjilanit. Gjakovarët kësaj ndeshje iu qasën me një komoditet paksa më të madh, duke e pasur parasysh edhe fitoren në ndeshjen e parë me rezultat 3:2 në Gjilan. Skuadra gjakovare qysh në minutën e dhjetë ka realizuar epërsinë 1:0 me golin e futbollistit Venhar Sermaxhaj.

Goli i hershëm pothuajse edhe preu këmbët gjilanasve që të kthejnë rezultatin në vazhdim të lojës. Mark Milicaj në minutën e 47-të ka shtuar epërsinë në 2:0 dhe shuar të gjitha gjasat për finalen e kupës.

Mysafirët shënuan gol në minutën e 90-të nga futbollisti Chijioke (i cili më parë huqi një penallti. Gjakovarët është hera e dytë pas luftës që futen në finalen e kupës së Kosovës. Me 6 qershor, në stadiumin e qytetit në Prishtinë, do të zhvillohet finalja e kupës në mes Lirisë dhe Vëllaznimit.

Rezultatet

Gjysmëfinalja

Liria-Besa 2:1 (3:3)

Vëllaznimi-Gjilani 2:1 (3:2)

Në kllapa janë rezultatet e ndeshjeve të para /botasot

Më kërshëri të veçantë nga dashamirët e futbollit priten ndeshjet e kthimit të gjysmëfinales së kupës së Republikës së Kosovës në futboll.

Liria në Prizren pret Besën e Pejës, me të cilën ndeshjen e parë luajti baras 3:3, ndërsa në Gjakovë Vëllaznimi takohet me Gjilanin. Gjakovarët ndeshjen e parë e fituan në Gjilan me rezultat 3:2 dhe ka një përparësi të mirë në ndeshjen e kthimit.

Në Prizren pritet ballafaqim atraktiv për adhuruesit e këtij sporti në mes skuadrave të Rrafshit të Dukagjinit, Liria-Besa. Futbollisti prizrenas, Uliks Emra, ka thënë nuk do të lejojnë kurrfarë befasie në ndeshjen e kthimit me gjithë respektin e madh që ka për Besën.

“Mendoj se jemi paksa më të favorizuar ndaj Besës për shkak të rezultatit që kemi arritur në Pejë me shifra 3:3. Ky rezultat na jep paksa përparësi në fushën tonë. Lirisë i konvenon edhe barazimi 0:0, 1:0, por edhe 2:2, të cilat e dërgojnë në finale. Liria nuk do të hyjë me mentalitetin vetëm të luajë baras, por të shënojë fitore dhe të dëshmojë se ka skuadër shumë më të mirë se rivali.Besa ka skuadër të mirë, megjithatë Liria është më e mirë. Kemi rastin të shkojmë në finale dhe të luftojmë që të rrëmbejmë kupën e Kosovës. Këtë rast të mirë që e kemi nuk do të lëshojmë, por do të shfrytëzojmë maksimalisht. Assesi s’do të lejojmë të ndodh befasia në Prizren, por do të japim maksimumin në ndeshje që të shënojmë fitore njëherësh të gëzojmë tifozerinë tonë”, tha Emra.

Liria nuk do të ketë mungesë në lojë, por do të futet më përbërjen më të mirë.

“Përparësia më e mirë është se do të luajmë komplet dhe kjo do të jetë një mundësi e mirë për të triumfuar sa më lehtë ndaj rivalit. Është motiv i lartë të të gjithë futbollistët për këtë ndeshje, ku shpresoj se fitorja do të jetë e jona”, theksoi Emra.

Kryetrajneri i Besës së Pejës, Genc Hoxha, thotë se gëzon fakti se disa nga futbollistët e dënuar, e disa të lënduar do të kthehen pikërisht për në ndeshjen gjysmëfinale.

“Natyrisht se rezultati i ndeshjes së parë në Pejë nuk shkon në favorin tonë, megjithatë, kemi skuadër që dimë dhe mundem të thyejmë Lirinë në Prizren. Në përbërjen e parë janë kthyer Haxhi Zeka, i cili ka qenë i dënuar me tri ndeshje, po ashtu edhe Florent Papuqi, që vuajti dënimin e një ndeshje. Në radhët e Besës kthehen edhe dy futbollistët që kanë sanuar lëndimin, si Mensur Duraku, Elvis Gacaferi e Krenar Vokshi. Rikthimi i këtyre futbollistëve bënë me dije se Besa do të kërkojë rezultat të favorshëm dhe hyrjen në finalen e kupës së Republikës së Kosovës. Kundër Lirisë do të kemi mungesën e Bekim Bajraktarit, por si do që të jetë, Besa do të jetë shumë më e fortë se në ndeshjen e parë të gjysmëfinales. Liria është skuadër e respektueshme, me traditë, por Besa do të dëshmojë se dinë të fitojë edhe jashtë Pejës”, tha Hoxha.

Gjilani do të ketë sprovë të vështirë që ta thyejë Vëllaznimin në Gjakovë, skuadër që është më e shikuara në kampionatin e Kosovës. Vëllaznimi që udhëhiqet nga kryetrajneri Ajet Shosholli, synon që ta fitojë edhe ndeshjen e kthimit. Muharrem Sahiti, kryetrajner i Gjilanit, gjasat që të shënojë rezultat të mirë i sheh mjaft të mira megjithëse do të luajë si mysafirë.

Ndeshjet dhe gjyqtarët

Liria-Besa (3:3) P. Hasani, A. Latifi, J. Musolli.

Vëllaznimi-Gjilani (3:2) M. Ferati, A. Gashi, Z. Miranaj.

Ndeshjet fillojnë në orën 16.00

Në kllapa janë rezultatet e ndeshjeve të para /botasot

Ndeshjet e para të gjysmëfinales së Kupës së Kosovës në futboll kanë pasur rrebesh gola. Në Pejë janë shënuar gjithsej gjashtë gola (Besa-Liria 3:3), ndërsa pesë gola në Gjilan (Gjilani-Vëllaznimi 2:3).

Për dy ndeshje të zhvilluar u shënuan 11 gola, çka dëshmoi një efikasitet të lartë të sulmuesve. Liria mori barazim në Pejë me Besën, ndërsa Vëllaznimi nga Gjakova shënoi fitore me rezultat 3:2 në Gjilan kundër Gjilanit. Si Liria po ashtu edhe Vëllaznimi arritën rezultat të favorshëm për ndeshjen e kthimit, të cilat zhvillohen pas dy jave përkatësisht me 26 maj.

Në takimin Besa-Liria ka qenë ndeshje dramatike sa i përket rezultatit po ashtu edhe i ka mbajtur edhe ata pak shikues (300-sish) në ankth. Liria në fund të pjesës së parë kaloi në epërsi me rezultat 0:1 me golin e bukur nga rreth 20 metra që ka shënuar futbollisti Rafet Mullallari.

Në pjesën e dytë, ndryshuan gjërat dhe pejanët vërsulen më të gjitha forcat në barazimin e rezultatit, të cilën e arritën në minutën e 54-të falë golit të futbollistit Granit Çekajt. Nuk kaluan as 11 minuta lojë dhe Besa kaloi në epërsi. Blerim Hysenlekaj nga rreth 20 metra dërgon një gjuajtje të fortë dhe shënon gol të bukur, duke kaluar skuadrën e tij në epërsi me shifrat 2:1.

Liria assesi nuk dorëzohet, por merr veten me lojë të mirë. Në minutën e 76-të të ndeshjes, Fati Karahoda pas një veprimit të mirë barazoi shifrat 2:2. Besa vazhdon me raste të shumta nëpërmjet Egzon Gashit e Blerim Hysenlekajt, të cilët sikur t’i konkretizonin të gjitha rastet, sigurisht se pejanët edhe do të fitonin përballjen dukagjinase.

Fetim Kasami në minutën e 85-të shënoi për epërsinë 3:2 për pejanët. Kur dukej se Besa siguroi një fitore minimale, ngjau e kundërta. Ermir Gjananoviq prishi gëzimin e pejanëve, duke shënuar golin e barazimit pikërisht në minutën e 88-të.

Liria arriti të luajë baras 3:3 dhe e pret ndeshjen e kthimit në Prizren me rezultat paksa më të favorshëm. Gjilani në vatër të vet është mposhtur nga Vëllaznimi me shifrat 2:3 dhe vështirë do të ketë për ndeshjen e kthimit. Vëllaznimi ka bërë një hap të madh drejt finales së kupës së Kosovës, por që e pret edhe një ndeshje pas dy jave në Gjakovë. Skuadra e Gjilanit nuk do të thotë se ka humbur të gjitha gjasat, pasi janë edhe 90 minuta lojë në ndeshjen e kthimit në Gjakovë.

Njëri prej futbollistëve më të mirë të Lirisë së Prizrenit, Uliks Emra, tha se qëllimi i skuadrës së tij është të dëshmojnë futboll cilësorë në Raiffeisen Superligën e Kosovës.

Liria është në vendin e katërt me 40 pikë të tubuara dhe vetëm shtatë pikë larg vendit të parë në tabelë, Trepçës. Prizrenasit në stinorin pranveror po dëshmojnë lojëra mjaft të mira dhe si rezultat i kësaj ende shpresojnë të luftojnë për titullin e kampionit. Emra tha se Liria nuk e ka edhe prioritet që të ndjekin titullin, por synim është që të luajnë futboll të hapur dhe cilësorë për të kënaqur adhuruesit.

Uliks Emra ndeshjen me Hysin e sheh si një mundësi që mund të futen në valle seriozisht për titull. Sipas tij, në rast të fitores, Liria do të rishqyrtojë pozicionin e saj sa i përket luftës për titull.

“Me Hysin të mërkurën e kemi një ndeshje mjaft të vështirë. Me plotë kuptimin e fjalës them se ky ballafaqim është edhe derbi i javës dhe tërë opinioni i ka sytë të drejtuar nga kjo ndeshje. Megjithatë, si skuadër nuk jemi të preokupuar se çfarë rezultati do të ketë kjo ndeshje, por parësore te ne është të dëshmojmë futboll cilësorë. Në Merdare do të shfaqim lojë të hapur dhe të arsyetojmë derbin e kësaj jave. Synimi jonë është të fitojmë tri pikë, të cilat do të shtyjnë Lirinë të rishqyrtojë synimet e saja në luftë për titullin e kampionit. Nuk jemi larg për titull, megjithëse nuk e kemi edhe prioritet. Shtatë pikë nga vendi i parë nuk janë edhe shumë dhe të paarritshme, megjithatë synimi jonë është të luajmë futboll cilësorë sepse futbolli luhet për t’i kënaqur adhuruesit”, theksoi Emra.

Liria nuk do të jetë komplet për sfidën me Hysin në Merdare. Këtë ndeshje do të mungojë njëri prej futbollistëve më përvojë dhe njëherësh kapiten i skuadrës, Fitim Krusha.

“Sigurisht se do të jetë hendikep mungesa e Krushës, i cili ka tre kartonë të verdhë dhe duhet të pushojë. Me gjithë mungesën e tij, Liria do të shkojë vetëm për rezultat të favorshëm dhe për asgjë tjetër. Futbollistët të tjerë janë të gjithë të gatshëm dhe besojmë se do të dëshmojmë vlerat tonë te një skuadre me traditë ashtu si i ka hije”, ka thënë Emra.

Ndeshja në mes Hysit dhe Lirisë zhvillohet sot në orën 16.00 dhe luhet në stadiumin e futbollit në Merdare të Podujevës.

Kryetrajneri i Vëllaznimit, Ajet Shosholli, ndihet shumë i lumtur me fitoren që arritën në Prizren ndaj Lirisë.

“Mendoj se është një fitore e mirë dhe shumë e rëndësishme për ne në Prizren. Liria pati iniciativën në fushë, por edhe ne luajtëm shumë mirë taktikisht dhe ia dolëm të marrim tri pikë. Më i miri ka qenë portieri Kushtrim Mushica, i cili ishte trim i kësaj ndeshjes dhe më i merituari për këtë fitore. Kjo fitore jep një motiv shtesë për Vallëznimin në ndeshjet e radhës në luftë për sigurimin e ekzistencës në shoqërinë elite”, tha Shosholli.

Skuadra e Vëllaznimit renditet në vendin e 11-të me 22 pikë dhe gjatë kësaj të mërkure në fushë të veten pret Hysin. /botasot

Skuadra e futbollit Liria nga Prizreni me fitoren që shënoi ndaj Flamurtarit të Prishtinës, kaloi në vendin e dytë me 34 pikë në Raiffeisen Superligën e Kosovës në futboll.

Liria shënoi fitore 1:0 falë golit të shënuar nga Fatih Karahoda pikërisht në minutën e 29-të të takimit. Kjo ndeshje është zhvilluar në kuadër të javës së 21-të të elitës së futbollit.

Liria luajti mjaft mirë, por edhe Flamurtari dëshmoi lojë të mirë, por nuk arriti të kthehet me një pikë. Liria tashmë i shton gjasat reale në luftë për titullin e kampionit, e cila është katër pikë më pak se i pari në tabelë. Flamurtari më këtë humbje zbret në vendin e pestë në tabelë me 32 pikë të tubuara.

Skuadra me traditë të futbollit, Liria nga Prizreni, në dy javët e para të stinorit pranveror në Raiffeisen Superligë nuk ka dëshmuar lojën e pritur.

Dashamirët e këtij sporti kanë pritur lojë më të mirë dhe efektive të prizrenasve, por kjo nuk ndodhi. Një fitore dhe një humbje në hapje të stinorit pranveror, pak a shumë janë shqetësuese për dashamirët e Lirisë, por jo edhe për kapitenin e skuadrës, Fitim Krushën.

Liria shënoi fitore në Prizren 1:0 kundër Ferizajt dhe pësoi humbje me të njëjtin rezultat në Vushtrri nga Kosova. Krusha tha se nuk ka pasur krizë të lojës, por sipas tij, nganjëherë edhe kur luan mirë mundësh të humbësh apo edhe rastet të mos realizohen.

“Humbja në ndeshjen e parë që kemi pësuar në Vushtrri nga Kosova mund të them deri diku ka ndikuar edhe fusha e papërshtatshme, megjithatë kjo nuk është e justifikueshme. Pastaj në Prizren me Ferizajn luajtëm shumë mirë, krijuam dy-tri raste të volitshme shënimi qysh në pjesën e parë, por nganjëherë edhe nuk e do. Kështu që, në Liri nuk ka krizë të lojës, por si shumë skuadrave të tjera edhe neve na ndodh që mos të kemi ditën”, theksoi Krusha.

Ai shtoi: “Liria askush nuk mund të thotë se s’ka pasur pranverë të mirë. Liria për kupë e ka eliminuar Hysin, skuadër e cila është kandidate kryesore për titullin e kampionit. Arritëm të jemi në gjysmëfinale të kupës dhe jemi kandidatë për këtë trofe. E mira është në klubin tonë se nuk kemi hyrë me çdo kusht të fitojmë trofe, por nëse e meritojmë pse edhe mos të stolisem me kupën e Kosovës”.

Krusha tha se në fundjavë do të shihni vlerat reale të lojës së Lirisë. “Përderisa në dy ndeshjet e para nuk i ka shkuar Lirisë, tashmë do të shihni lojën e mirëfilltë të skuadrës sonë në Kastriot kundër KEK-ut. Liria nuk është e dobët, por ka skuadrën më të mirë në ligë dhe me futbollistë të dëshmuar e më përvojë. Liria do të jetë njëra prej skuadrave që do të mrekulloi me lojë dhe do të dëshmojnë traditën e saj të gjatë të futbollit që ka.

Synimi yni është që të ngjitem sa më lartë në renditjen e tabelës dhe nuk do të thotë të kemi mendjen vetëm të titulli, por të bëjmë lojë të bukur dhe t’i kënaqemi edhe dashamirët e kësaj loje. Fundja gabimet që janë shfaqur në dy ndeshjet e para mendoj se ia kemi dalë t’i evitojmë”, theksoi Krusha. Liria zë vendin e gjashtë me 28 pikë të tubuara. /botasot