Ngasësi spanjoll Fernando Alonso ka nënshkruar kontratë të re me Ferrarin, që do ta mbajë atë me ekipin italian deri në fund të sezonit 2016.

Njoftimi erdhi pak para se Alonso të hynte në vitin e tij të fundit të kontratës, që kishte nënshkruar kur erdhi në Ferrari më 2009.

“Jam shumë i lumtur që kemi arritur këtë marrëveshje”, tha 29 vjeçari, dy herë kampion i botës në Formula 1.

“Menjëherë jam ndjerë mirë në Ferrari, që tani më është bërë si një familje e dytë”, shtoi ai. Me nënshkrimin e një marrëveshjeje të këtillë afatgjate, Alonso është i bindur se tani do të përfundojë karrierën e tij në Formula 1 me Ferrarin.

“Besoj te njerëzit që punojnë në Maranello dhe te të tjerët që i udhëheqin ata. Është normale të vendosi të vazhdoj marrëdhëniet e mia në afat të gjatë si ky, me një ekip ku pa dyshim se një ditë do të përfundoj karrierën time në Formula 1”, u shpreh ai.

Presidenti i Ferrarit, Luca di Montezemolo, shtoi: “Është kënaqësi e madhe që kemi vazhduar kontratën me një ngasës që gjithmonë ka dëshmuar mentalitetin fitues edhe në rrethanat më të vështira. Fernando ka të gjitha kualitetet e nevojshme të luajë rol udhëheqës në historinë e Ferrarit dhe shpresoj se së shpejti do të arrijë të na sjellë fitore të reja”.

Lewis Hamilton sheh tek Fernando Alonso, pilotin e Ferrarit, rivalin e tij kryesor në botën e Formula 1.

Edhe pse Sebastian Vettel me Red Bull është kampioni i botës në fuqi dhe fituesi i garës së parë të sezonit, piloti britanik i Mclaren nuk e sheh si rival.

“Gjithmonë mendoj se rivali im kryesor është Alonso. Mund ta quaj si “armikun” tim dhe kjo për shkak të historisë time në Formula 1 që kur kam filluar karrierën. Është një lloj rivaliteti i ngjashëm me atë të pilotëve Ayrton Senna dhe Alain Prost”, u shpreh Hamilton për ‘The Guardian’.

Më i “butë” është rivaliteti me Vettel, të cilin britaniku e konsideron një shkallë më poshtë, edhe pse nuk e thotë hapur: “Nuk besoj se Vettel është kundërshtari i vërtetë. Nëse do të vazhdojë të ketë një makinë kaq të shpejtë mund të bëhet. Por, jam i bindur se nëse do të kemi në dispozicion mjete të njëjta, atëherë do të shohim gara të vërteta.”

Dy herë kampioni i botës në Formulën 1, Fernando Alonso, mendoi se kolegu i tij, Robert Kubica, nuk do të mundej t’i mbijetonte aksidentit të pësuar në 6 shkurt, gjatë pjesëmarrjes në një garë reli në Itali.

”Mbeta i shokuar kur mësova lajmin. Kur shkova në spital dhe pashë që ishte në atë gjendje, seriozisht mendova se nuk do të mbijetonte”, deklaroi ferraristi.

”Aftësia e mjekëve për të kuruar dëmtime aq të rënda është e pabesueshme. Tani Kubica është duke u riaftësuar me shpejtësi dhe shpresoj ta shoh shumë shpejt në garat e Formulës 1. Botërori do të bëhet më i bukur kur ai të rikthehet”.

Pavarësisht se shumë zëra janë bashkuar për të kritikuar Kubica-n rreth faktit që nuk u tregua i kujdesshëm, duke marrë pjesë në gara përpara fillimit të sezonit në Formulën 1, Alonso i del në mbrojtje vendimit të polakut.

”Ata që jetojnë me këtë profesion kanë nevojë të vazhdueshme për të rritur adrenalinën në trupin e tyre dhe garat e relit janë një mënyrë e mirë për t’a bërë këtë. Unë stërvitem me biçikletë çdo ditë kur kam kohë të lirë.

Përpara disa javësh, kur po shkoja të takoja një mik, një kampion pësoi një aksident disa dhjetëra metra përpara meje. Nëse do të kisha qenë pak më përpara, ai do të më kishte përplasur edhe mua. Kështu është jeta, rreziqet nuk mund t’i shmangësh asnjëherë tërësisht”.

Bastexhinjtë shohin ferraristin Fernando Alonso si pilotin me më shumë shanse për të fituar titullin në 2011-n, bëri të ditur sot rrjeti informativ “Mediaset”.

Dy pilotët e tjerë me më shumë shanse për t’u renditur të parët në fund të Botërorit të 2011-s janë kampioni i botës në fuqi, Sebastian Vettel dhe britaniku Lewis Hamilton.

Vlera e spanjollit për titullin është 3,75, ndërsa për Vettel pak më e lartë, me koefiçent 4. Hamilton do të jetë kampion një në pesë raste.  Favoriti i katërt më i mundshëm është Michael Schumaker, me koefiçent 12.

Vijojnë mes fituesve të mundshëm Webber (15), Rosberg (15), Button (15), Kubica (25), Massa (25), Kobaiashi (150) e Barrichello (150).

Edhe pse nuk arriti të shpallej kampion i Formula 1 këtë sezon, piloti i Ferrarrit, Fernando Alonso, është votuar si piloti më i mirë i kampionatit nga shefat e skuderive të Formula 1, sipas një sondazhi të revistës ‘Autosport’.

Kampioni i Botës, Sebastian Vettel, është renditur i dyti.

Klasifikimi, i marrë duke përdorur sistemin e pikëve sipas rregullores së këtij sezoni (25-18-15-12-10-8-6-4-2-1), ka nxjerrë pilotin spanjoll të parin, me nëntë pikë avantazh ndaj të riut gjerman.

“Më bëhet qejfi që drejtuesit e skuadrave më kanë përzgjedhur mua. Është një motiv më shumë për ta konsideruar sezonin që sapo përfundoi një sezon të suksesshëm sepse unë dhe Ferrari luftuam deri në fund”, u shpreh Alonso.

Kjo është renditja e pilotëve më të mirë, sipas sondazhit të realizuar nga ‘Autosport’ me votat e “team principal”:

1. Alonso            229
2. Vettel             220
3. Hamilton        196
4. Webber          146
5. Kubica           129
6. Button             86
7. Rosberg          68
8. Hulkenberg     17
9. Massa            17
10. Barrichello    11

Piloti i Ferrarit, Fernando Alonso, nuk duket shumë i shqetësuar përpara garës së fundit të sezonit të Formula 1, edhe pse në këtë garë do të luftojë për titullin kampion.

“Objektivi për këtë garë është që të përfundoj i pari ose i dyti në mënyrë që të shpallem kampion. Nga e premtja deri të dielën do të punojmë për të arritur këtë”, u shpreh Alonso.

Për Alonson, të shtunën, gjatë provave zyrtare “renditja në vijën e parë të nisjes është e mundur dhe nëse arrihet pole position, aq më mirë.”

Në rast se të dielën nuk arrin të fitojë titullin kampion, Alonso u shpreh: “Sigurisht që mërzitesh nëse e humb titullin në garën e fundit, por unë nuk kam për çfarë t’i ankohem vitit 2010. Në dy vitet e fundit kam luftuar në vendet e ulta të klasifikimit. Edhe Ferrari ka pasur një sezon të keq në 2009-ën.”

“Në këtë vit të parë të marrëdhënies sonë jemi duke luftuar kundër një makine dominuese si Red Bull, kështu që nuk ka rëndësi se çfarë ndodh të dielën. Personalisht, do kem kujtime të bukura nga ky vit”, deklaroi piloti spanjoll.

Piloti i Ferrarit, Fernando Alonso, është 100 për qind i sigurt se do të fitojë titullin e kampionit në Formula 1 në garën e fundit të këtij edicioni, që do të zhvillohet më 14 nëntor në Abu Dhabi. Spanjolli prin në renditjen e përgjithshme me 246 pikë, duke lënë pas vetes pilotët e skuderisë Red Bull, Mark Webber (238) dhe Sebastian Vettel (231).

“Njëqind për qind jam i sigurt se do ta fitoj titullin. Më duhet të përfundoj garën në Abu Dhabi vetëm në vendin e dytë dhe asgjë më shumë. Nuk ka rëndësi kush fiton në Abu Dhabi, nëse unë mbetem i dyti”, është shprehur Alonso.

Megjithatë, Alonso ka dëshirë që në Abu Dhabi të triumfojë dhe të shënojë fitoren e gjashtë këtë edicion, e cila do t’i dhuronte edhe titullin e kampionit. Shpreson në festë të dyfishtë.

“Synimi im është që të fitoj njërën nga dy pozitat e rreshtit të gjatë kualifikimeve të shtunën, ndërsa të dielën do të mundohem edhe të fitoj garën. Nëse nuk e arrij këtë dhe nuk jam mjaft i shpejtë, atëherë do të shkoj për opsionin e dytë. Do të mundohem të jem i dyti dhe me këtë i jap fund këtij problemi”, është shprehur Alonso.

Mirëpo, i mendimit të njëjtë me Alonson nuk është edhe piloti i Red Bullit, Vettel, që triumfoi në garën e fundit të mbajtur në Brazil. Vettel ka paralajmëruar se është i gatshëm t’i ndihmojë kolegut të tij, Webber, për të fituar titullin e kampionit nëse sheh që vetë këtë nuk do të mund ta bëjë. Vettel është prapa Alonsos 15 pikë, kurse Webber ngec me vetëm tetë pikë.

“Mendoj se ky skenar është shumë i qartë. Nëse nuk mund të fitoj titullin e kampionit, atëherë do t’ia jap një ndihmë Webberit, sepse ai do të jetë më afër”, është shprehur Vettel.

Piloti tjetër, Webber, ka thënë se ende ka gjasa për të fituar titullin dhe se nuk do të bazohet në ndihmën e askujt të dielën në Abu Dhabi. Ai thotë se është i lumtur që Vettel nuk e lejoi të triumfonte në Brazil. Webber garën e përfundoi i dyti, kurse Alonso mbeti në pozitën e tretë.

“Do të më kishte ndihmuar shumë, por kjo nuk është filozofia jonë. Kam ende gjasa të mëdha për të fituar titullin e kampionit dhe do ta bëj të pamundurën në Abu Dhabi për të triumfuar pa ndihmën e askujt”, është shprehur Webber.

Ndërkohë, piloti i vetëm që tashmë është dorëzuar për titullin e kampionit është Lewis Hamilton i McLarenit. Hamilton zë vendin e katërt dhe ka 24 pikë më pak se Alonso dhe teorikisht edhe ai ka gjasa për titull.

“Nuk kam çka të them, thjesht nuk mund të fitosh me një bolid që nuk është i shpejtë. Më duhet vetëm mrekullia për të fituar titullin e kampionit, që është e pamundur”, tha ai. “Tash vetëm do të fokusohem të tuboj pikë për renditjen e konstruktorëve dhe asgjë më shumë”.

Kampioni në fuqi, Jenson Button, në edicionin e shkuar titullin e kampionit e fitoi në Brazil, ndërsa këtë edicion i tha lamtumirë titullit në po këtë shteg.

“E fitova këtu dhe këtu e humba titullin e kampionit. Mund të them që ka qenë një edicion i mirë dhe kam mësuar shumë. Pres që edicionin e ri të jem më i suksesshëm”, ka thënë Button, që është i pesti në renditje me 199 pikë të mbledhura.

Gara në Abu Dhabi të Emirateve të Bashkuara Arabe do të shënojë edhe debutimin e këtij shtegu në kalendarin e Formula 1 dhe ka fatin që të përcaktojë kampionin e ri.

Katër garuesit që janë në luftë për titull:

Pikë
1. Fernando Alonso    246
2. Mark Webber    238
3. Sebastian Vettel    231
4. Lewis Hamilton    222

(Vendi i parë sjell 25 pikë, i dyti 18, i treti 15, i katërti 12, i pesti 10, e kështu me radhë)

Red Bull ka dominuar garën për Çmimin e Madh të Brazilit të zhvilluar në pistën e Interlagosit duke zënë vendin e parë dhe të dytë, përkatësisht me Vetel dhe Veber.

Vetel bëri një start të mirë duke marrë vendin e parë për të dominuar më pas të gjithë garën, i ndjekur nga shoku i tij i skuadrës, Mark Veber për të ardhur tek vendi i tretë në podium që plotësohet nga Fernando Alonso.

Megjithëse u rëndit i treti, Alonso vazhdon të mbajë kryesimin në renditje e përgjithshme për pilotë me 246 pikë, i ndjekur nga Veber me 238 dhe Vetel me 231.

Ndërsa lufta për titullin kampion për pilotë vazhdon ende, ajo për konstruktorë është mbyllur matematikisht Red Bull ka fituar këtë kampionat, pavarësisht rezultatit në garën e fundit që do të mbahet në Abu Dhabi javën e ardhshme.

Piloti brazilian i Ferrarit, Felipe Massa, pranon që mund të heqë dorë nga triumfi në garën e shtëpisë së tij për të ndihmuar shokun e skuderisë, Fernando Alonso, për të fituar titullin kampion.

“Nëse do të varej nga unë, patjetër që do ta ndihmoja. E kam bërë edhe më parë në vitin 2007”, u shpreh Massa për mediat braziliane.

Massa i referohet sezonit 2007, kur lejoi që shoku i tij i atëhershëm tek Ferrari, Kimi Raikkonen, ta parakalonte po në pistën braziliane.

“Nuk mund të them që Alonso është shoku im më i mirë i ekipit që kam pasur. Kam pilotuar me Schumacher, për të cilin flet vetë karriera e tij. Gjithashtu edhe Raikkonen ishte një pilot i shkëlqyer. Besoj se të tre janë në të njëjtin nivel”, deklaroi Massa.

Gjithashtu, braziliani pranoi se me makina të njëjta, Alonso ka pasur një rendiment më të lartë se vetë ai: “Fernando është treguar më kompetitiv këtë vit. Për mua ka qenë një vit i keq, sidomos përsa i përket provave zyrtare. Alonso e meriton titullin”.

Fernando Alonso është fituesi i Çmimit të Madh të Koresë së Jugut në Formula 1, duke marr edhe kreun e klasifikimit.

Piloti i Ferrarit ka lënë pas Lewis Hamilton të McLaren dhe shokun e tij të skuadrës Felipe Massa.

Gara e Koresë është shoqëruar me incidente të shumta të shkaktuara nga rreshjet e shiut, duke detyruar disa pilotë të dalin nga pista.

Nëntë xhiro nga përfundimi i kësaj gare Sebastian Vettel ka dalë nga pista pas një defekti në motorin e makinës. Piloti i Red Bull që kryesonte garën që prej fillimit, humbi kështu mundësinë për të pretenduar për titullin e kampionit të botës.

Ndërkohë shoku i tij i skuadrës Mark Webber doli nga pista gjatë një përplasjeje, disa xhiro pas largimit të makinës së sigurisë.

Pas garës së sotme, kreun e klasifikimit të pilotëve e mban Alonso me 231 pikë duke lënë pas Webber me 220 dhe Hamilton me 210.

Ndërsa në klafikimin e përgjithshëm për konstruktorët, Red Bull kryeson me 426 pikë, i pasuar nga McLaren me 399 dhe Ferrari me 374 pikë.