Ferizaj duket se është më i përgatitur se kurdoherë për fillimin e Kampionatit të ri të Kosovës në futboll.

Kryetrajneri i kësaj skuadre, Agron Selmani, tha se përgatitjet kanë rrjedhë si është më së miri dhe në të gjitha repartet është rritur edhe cilësia e lojës. Si të gjitha skuadrat të tjera të elitës së futbollit, edhe ferizajasit përgatitjet i kanë zhvilluar në Ferizaj dhe nuk kanë shkuar edhe jashtë Kosovës. “Po e përdori atë thënien: ‘Të flasim sa më pak, të përgaditem sa më mirë’.

Prandaj, nuk kemi kohë të filozofojmë, por të bëjmë një skuadër sa më të fortë”, tha Selmani. Ferizaj pas luftës e këndej vazhdimisht është përballur me telashe të shumta, por ky vit duket më shpresëdhënës dhe me synime më të mira.

Selmani tha se ka një kuadër të mirë të futbollistëve, por që mëton të ketë edhe dy sulmues efikas që do të kompletonte skuadrën. “Ferizaj ka krijuar skuadër të mirë, por që i duhet edhe disa dy sulmues të spikatur dhe mendoj se do të kompletohemi në tërësi”, ka thënë Selmani.

Në bisedime me Ertan Hasan-in dhe Agon Ramadanin

Ferizaj është prej skuadrave që më së paku është përforcuar, njëkohësisht edhe ka ruajtur skeletin e futbollistëve. Klub që kërkon përforcime të reja dhe mundësitë janë të mëdha të sjellin edhe dy futbollistë.

“Kryesia deri më tash i ka përmbushur të gjitha premtimet. Drejtuesit e klubit janë duke biseduar me dy futbollistë të repartit sulmues, Ertan Hasan-in, ish-futbollist i Prishtinës dhe i Vëllaznimit nga Gjakova, si dhe Agon Ramadanin e Flamurtarit të Prishtinës.

Ata bëjnë përpjekje të sjellin në Ferizaj këta dy sulmues që mendoj se do të kompletohet reparti i sulmit dhe do të jemi më të fortë”, tha Selmani.

Mbrojtja – e fortë, duhet ende punë në sulm

Selmani është i kënaqur me repartin e mbrojtjes, por sipas tij, duhet efikasitet më i madh në vijën e sulmit. “Ferizaj ka zhvilluar disa ndeshje kontrolluese deri më tash dhe në secilin kemi nxjerr diçka të re.

Ndeshjen e fundit miqësore e kemi me skuadrën e Gjilanit, e cila do të shërbej si test final për të caktuar edhe përbërjen e parë për ndeshjen e parë në kampionat që kemi në fundjavë në Ferizaj me Trepçën ‘89. Në ndeshjen miqësore kemi mundur Ballkanin e Therandës me rezultat 2:1, pastaj me shifra 6:1 Lepencin nga Kaçaniku, ndërsa barazuam me Lepencin 2:2, pësuam humbje nga Hysi i Podujevës dhe Liria e Prizrenit me rezultat identik 2:1.

Nga kjo del se me mbrojtje jemi shumë të kënaqur, përveç që duhet një efikasitet më i madh në vijën e sulmit”, ka thënë Selmani.

Kushtet – si në klubet e tjera

Edhe Ferizaj nuk qëndron financiarisht aq mirë sikurse edhe klubet të tjera të elitës. Fusha është e aftësuar për zhvillimin e ndeshjeve kampionale, aty këtu ndonjë vërejtje që ka pasur Komisionin për Inspektimin e Fushave nga FFK-ja.

“Fusha është në gjendje të mirë dhe e përshtatshme për zhvillimin e lojës. Fusha nuk paraqet vështirësi për zhvillimin e ndeshjeve, por i plotëson kushtet çfarë i kërkojnë edhe organet kompetentet të FFK-së”, tha se Selmani.

Vjen Sërmaxhaj, shkon Haliti

Mesfushori Venhar Sërmaxhaj është përforcimi më i mirë i Ferizajt, i cili pritet të luajë rolë të rëndësishëm. Nga klubi është larguar Avdyl Haliti, i cili do të udhëtojë për në Gjermani për shkaqe familjare. “Sërmaxhaj është përforcim i duhur, ndërsa Haliti nuk do të jetë pjesë e skuadrës me arsyetim se do t’i bashkohet familjes në Gjermani.

Me fondin e tashëm të futbollistëve synojmë mesin e tabelës dhe shpresoj se do të jetë e realizueshme”, theksoi Selmani.

Katër klubet e hendbollit nga Kosova që bëjnë pjesë në garat evropiane, si Kastrioti i Ferizajt, kampion, Besa Famiglia nga Peja, fitues i kupës (meshkujt), Prishtina, kampione, Kastrioti, fitues i kupës (femrat) janë në hamendje të përforcohen apo jo.

Në afatin kalimtar që ka nisur prej një korrikut asnjëra prej këtyre skuadrave nuk ka sjellë përforcime adekuate përveç Kastrioti i Ferizajt (meshkujt) që është përforcuar me Alban Dobroshin e Prishtinës. Kryetari i klubit ferizajas, Izet Rushiti, tha se Kastrioti ka vazhduar kontratën edhe me tre hendbollistë.

“Me Alban Dobroshin jemi përforcuar, por ende nuk kemi arritur marrëveshjen me portierin e Prishtinës, Hektor Dobroshin. Kemi vazhduar kontratën edhe për një vit me portierin Bardhyl Abazin, dy maqedonasit Koqo e Risto Trajkovskin’, tha Rushiti. Klubi i hendbollit Prishtina (femrat), që merr pjesë në kupën e EHF-it është në negociata me gjashtë hendbolliste jashtë Kosovës. Kryetari i klubit prishtinas, Nebi Zariqi tha se bisedimet rrjedhin mjaft mirë, por finalizimi i marrëveshjes pritet deri në fund të javës. “Në bisedime jemi me tri hendbolliste nga Kale e Maqedonisë si dhe me tri nga Bullgaria”, tha Zariqi.

Emrat e këtyre hendbollisteve nuk bëhen të ditur, por sipas Zariqit, shpreson se shumica nga të negociuarat do të jenë pjesë e klubit bardhë e kaltër. Zariqi theksoi se Prishtina do të jetë e përforcuar dhe me bindje se lehtë do të kalojnë rrethin e parë të kupës së EHF-it. “Në rrethin e parë do të takohemi me një islandezet ose qipriotët dhe pa telashe do të kalojmë rrethin”, shpreh bindjen Zariqi. Ahmet Hysenaj-Petrova, kryetar i Kastriotit, gjatë kësaj jave ka pasur biseda të fshehta me tri hendbolliste nga Mali i Zi, por asgjë nuk ka zyrtare. “Në javën e ardhshme mund të ketë edhe të reja në këtë klub”, tha Hysenaj.

Kastrioti që merr pjesë në kupën e fituesve të kupave përgatitjet i ka shtyrë për një gusht dhe deri atëherë shpresojnë se do të janë komplet me përforcime të reja. KH Besa Famiglia nga Peja, garon në kupën e fituesve të kupave, mëton suksese në arenën ndërkombëtare. Edhe ky k klub është në bisedime me disa hendbollistë.

Sekretari i përgjithshëm i Federatës së hendbollit të Kosovës, Izet Gjinovci, tha se 12 gushti është dita e fundit që klubet ta paraqesin emëroren e hendbollistëve në EHF. Deri më tash asnjë përforcim zyrtar në FHK, kjo është shenjë se punët janë keq e më keq nëpër klube.

Nuk mbahet mend që Ferizaj ndonjëherë ka pasur basketboll të nivelit të duhur apo ndonjë organizim të mirëfilltë. Gjithmonë e kanë pasur një organizim për një muaj dhe në fund kanë ardhur në gjendje të mjerueshme të jesh apo të mos jesh.

Klubi i basketbollit Kastrioti i Ferizajt është në gjendje të mjerueshme dhe i shkapërderdhur pothuajse në tërësi. Në pritje që të vjen dikush dhe t’i qet në binarë. Behxhet Ibrahimi, njeri i basketbollit që me vite të tëra ka punuar në klubin e basketbollit Kastrioti e sheh një fije drite në fund të tunelit.

Ai tha se Kastrioti mund të ec para nëse e marrin njerëz të duhur, të sportit dhe që kanë erë pune e organizimit ose përndryshe basketbolli do të shuhet në tërësi në një qytet që ka hiq më pak se 170 mijë banorë.

“Kastrioti është në gjendje kritike. Një klub pa kryesi, i shkapërderdhur dhe askush nuk e ka të qartë se çka po ndodh. Nuk janë shuar të gjitha shpresat, por ekziston mundësia që të dalin prej krize. Po kush ta nxjerrë nga kriza? Vetëm njerëz që kanë erë në basketboll, që dinë të punojnë dhe që kanë strategji. Kastrioti është udhëhequr nga njerëz për interesat e veta dhe e kanë prurë në pozitë çfarë është tash. Prej se është rënë prej lige, ky klub nuk e di as vet si është mbajtur në këmbë edhe në ligën e parë”, tha Ibrahimi.

Muaji korrik llogaritet si muaj i shpëtimit të kësaj skuadre dhe që kanë dhënë premtime të mëdha edhe nga drejtoria e sportit të këtij qytetit.

“Në korrik do t’i qesim gjërat në fushë po qese e ka shkruar zoti. Besoj se me Drejtorinë e Sportit të qytetit dhe me njerëz që ia duan të mirën këtij sporti do të këndellem dhe të bëjmë klubin sadopak solid. Ka talent, ka basketbollist vendorë, që mund të rikthejmë klubin në elitë”, tha Ibrahimi.

Ai shtoi: “Do të pranoj pa ndonjë telashe postin e trajnerit, vetëm nëse vijnë njerëz që e meritojnë. Aktualisht klubi është pa trajner, i shkapërderdhur. Unë punoj me të rinjtë, por sa ia vlen kjo kur situata është shumë e rëndë”. Kastrioti i ka punët keq edhe në konkurrencën e femrave, e cila për shkaqe financiare ishte tërhequr nga garat. A është ky vit që do të këndellen edhe te meshkujt po ashtu edhe të femrave apo Kastrioti do të fundoset edhe më shumë. /botasot

Volejbollistët e AKPA Te Luzha nga Ferizaj, janë në prag të titullit të parë të Kosovës (meshkujt).

Ferizajasit udhëheqin me rezultat 1:0 në fitore në ndeshjen finale të play-offit kundër Trasing Group Prishtina. Ballafaqimi i dytë zhvillohet të enjten mbrëma në Qendrën e Rinisë dhe të Sportit në Prishtinë, me fillim në orën 19.00.

Prishtinasit kanë vetëbesim në vete dhe shpresojnë se do të shënojnë fitore dhe të barazohen me fitore, kësisoj t’i ruajnë gjasat për titull. Te dyja klubet kanë volejbollistë të mirë dhe vështirë është të parashikohet edhe fituesi.

Njëra prej hendbollisteve më të mira në Kosovë, Shqipe Tahiri, është duke shqyrtuar mundësinë të qëndrojë në radhët e Kastriotit të Ferizajt apo të gjejë ndonjë klub të ri.

Kjo hendbolliste është e pavendosur sesi do të ia bëjë tashmë, pasi nuk ka edhe kontratë me klubin ferizajas, me të cilën kanë fituar edhe trofeun e kupës së Republikës së Kosovës.

“Klubi i Kastrioti ka shumë synime, por mbetja ime do të varet se farë në të vërtet më afrojnë ata”, ka thënë Tahiri.

Kastrioti premton se do të përforcohet me hendbolliste për edicionin e ri të Kosovës si dhe për garat evropiane. Këto premtime do të realizohen në praktikë apo vetëm janë fjalë që do t’i marrë së shpejti era!

Skuadra e futbollit Ferizaj në ndeshjen e javës së fundit shënoi fitore me rezultat 2:1 kundër skuadrës së Gjilanit dhe kësisoj siguroi mbetjen në Raiffeisen Superligë.

Arsim Abazi, kryetrajner mënjeherë pas ndeshjes ka dhënë dorëheqje nga posti i kryetrajnerit ferizajas. Abazi me punën e tij që bëri së bashku me futbollistët me gjithë ato vështirësi që hasën siguruan mbetjen në ligë. Abazi ndahet me Ferizajn në mënyrë më të mirë, duke i lënë në shoqërinë elite.

Hendbollistët e Kastriotit nga Ferizaj janë kampion i ri i Superligës së Kosovës në hendboll në konkurrencën e meshkujve.

Ferizajasit në ndeshjen e javës së fundit në shtëpi shënuan fitore me rezultat 33:25 në ballafaqim me Drenicën nga Drenasi. Pas dhjetë vjetësh rikthehet titulli në qytetin e hendbollit, që është kremtuar në mënyrën më të mirë. Kastrioti nga 28 ndeshje të zhvilluara shënoi 25 fitore, një herë luajti baras dhe pësoi dy humbje, duke tubuara 51 pikë.

Kryetrajneri Fatmir Syla, është i lumtur për titullin e kampionit. Ai tha se puna e të gjithëve në klub ka qenë edhe rezultat i këtij suksesit të madh që ka arritur skuadra e tij. KH Kastrioti pothuajse 90 për qind të kampionatit ka mbizotëruar me lojëra të mira dhe si rezultat i kësaj edhe stolisen me titullin e kampionit, që është edhe i katërti pas pavarësimit të sportit të Kosovës. Titullin e parë Kastrioti e ka fituar në vitin 1991-92, ndërsa i dyti vjen në vitin 1992-93, i treti 1999-2000 dhe i katërti 2009-10.

Klub me traditë 52-vjeçare që këtë vit mëton të dëshmojë suksese edhe në garat evropiane. Kastrioti do të përfaqësojë Kosovën në kupën e EHF-it, ndërsa Besa Famiglia nga Peja, fitues i kupës, do të marrë pjesë në kupën e fitues të kupave evropiane. Prishtina ka qenë njëra prej skuadrave që ka luajtur mjaft mirë dhe ishte shembull për shumë skuadra sesi punohet me gjeneratën e re.

KH Prishtina zuri vendin e dytë me 44 pikë dhe shpallet nënkampione. Besa Famiglia, njëra prej skuadrave më të forta, renditet në vendin e tretë me 40 pikë. Pejanët duke iu falënderuar trofeut të kupës siguruan një vend në garat evropiane. Kampionatin më së keqi e ka përmbyllur Rahoveci, i cili qysh më herët ishte përjashtuar nga garat për shkak të mos zhvillimit të disa ndeshjeve. Në përgjithësi, kampionati i sapo-përfunduar me atë të kaluarin nuk ka pasur pothuajse fare dallim në cilësi.

K. G.

Rezultatet

Vëllaznimi-Prishtina 30:27 (16:14)

Kastrioti- Drenica 33:25 (15:13)

Besa Famiglia- Kosova 37:25 (17:9)

Trepça -Rahoveci 10:0 r.z.

Tabela

1. Kastrioti 28 25 1 2 893:665 51

2. Prishtina 28 21 2 5 943:769 44

3. Besa F. 28 20 0 8 828:707 40

4. Vëllaznimi 27 13 2 12 820:763 28

5. Kosova 27 11 1 15 756:794 23

6. Trepça 28 10 2 16 794:819 22

7. Drenica 28 6 2 20 745:855 14

8. Rahoveci 28 0 0 28 263:641 0

KH Kastrioti, kampion, nga liga largohet Rahoveci. Në garat evropiane shkojnë: KH Kastrioti, në kupën e EHF-it dhe Besa Famiglia, në kupën e fituesve të kupave evropiane. /botasot

Ndeshja e dytë finale e play-offit të Superligës së Kosovës në volejboll në konkurrencën e femrave në mes Kastriotit të Ferizajt dhe Universitetit të Prishtinës, do të zhvillohet të enjten mbrëma me fillim në orën 20.00, në palestrën e sportit “Bill Klinton” në Ferizaj.

Volejbollistet e Universitetit janë duke udhëhequr me rezultat 1:0 në epërsi me fitore dhe vetëm edhe një fitore i ndanë nga titulli i parë në historikun e tyre. Vashat universitare ndeshjen e parë e fituan në tajbrek me rezultat 3:2 ndaj Kastriotit.

Te dyja skuadrat në radhët e veta kanë volejbolliste cilësore dhe premtojnë paraqitje të mirë në ndeshjen e dytë finale. Kryetrajneri i ferizajasve, Abedin Ibrahimi, është optimist se në ndeshjen e dytë Kastriotit do të ia dalë që të shënojë fitore dhe të barazojë shifrat 1:1 në fitore. Ai është i bindur se skuadra e tij po këndellet dhe po e merr veten, duke e cilësuar se ndeshjen e parë në Prishtinë më shumë kanë humbur në saje të fatit sportiv.

Kastrioti më shumë është i përqendruar në volejbollistet më përvojë si Vildane Jashari, Ivanovën, Arbenita Ymeri etj. Universiteti ka skuadrën më të mirë këtë vit në krye me Shemsije Asllanajn, por edhe nga volejbollistet të tjera. Njëra prej volejbollisteve më me përvojë, Ganimete Gërbovci, beson se titullin do të festojnë në qytetin e Ferizajt.

“Universiteti i ka të gjitha mundësitë për fitore. Kemi skuadër më cilësore, më të organizuar dhe në çdo repart jemi më të mira. Ferizajaset më shumë përqendrohen në dy volejbolliste më përvojë, ndërsa të tjerat janë të cilësisë mesatare dhe pa ndonjë përvojë. Në Ferizaj shkojmë pa ngarkesë për faktin se e kemi epërsinë 1:0 në fitore dhe besoj se do të kryejmë edhe këtë ndeshje në favor tonin. Presim lojë të rivalitet të madh si zakonisht që dëshmojnë këto skuadra mes vete”, ka thënë Gërbovci.

KV Kastrioti mëton që të mbrojë titullin e kampionit, ndërsa Universiteti që të fitojë për herë të parë këtë trofe. “Universitaret” janë klub i ri, qe tre vjet janë themeluar. Trajneri Bahri Gjinovci (Universiteti) thotë se ky do të ishte suksesi më i madh për një klub që brenda një periudhe trevjeçare të ekzistimit të stoliset me dy trofe: kupën dhe titullin e kampionit të Republikës së Kosovës.

Volejbollistët e AKPA Te Luzha nga Ferizaj dhe Trasing Group Prishtina janë afër finales së Superligës së Kosovës në konkurrencën e meshkujve.

AKPA Te Luzha edhe në ndeshjen e dytë të gjysmëfinales së play-offit pret fitore kundër Therandës. Ndeshjen e parë ferizajasit e fituan me rezultat 3:0, ndërsa takimi i dytë luhet të enjten në orën 20.00 në palestrën e sportit në Therandë.

Të mërkurën takohen Drenica R& Rukolli – Trasing Group Prishtina, ndeshje e cila zhvillohet në palestrën e sportit në Vushtrri, me fillim në orën 17.00. Prishtinasit fituan përballjen e parë me rezultat 3:0, kësisoj presin fitore edhe në takimin e radhës.

Më në fund do të zhvillohet ndeshje e parë e finales së play-offit në Superligën e Kosovës në volejboll (femrat) në mes Universitetit të Prishtinës dhe Kastriotit nga Ferizaj.

Kryetrajneri i Kastriotit tha se në njëfarë mënyre iu ka dhënë “ultimatum” FVK-së se nëse deri të hënën nuk caktohet zhvillimi i ndeshjes së parë finale, ai do të tërhiqet nga garat e play-offit.

“Ultimatum” ky që ka dhënë rezultat sipas Ibrahimit. “Nganjëherë edhe verbohen sytë për të arritur suksese. Por, nuk duhet të vrapojmë pas rezultateve, por në të mirën e volejbollit. Më rëndësi është se ndeshja do të zhvillohet sipas propozicioneve të garave në palestër dhe jo në sallë të FShKF-së, aty ku nuk ka kushte për lojë.

Nuk e besoj se do të ketë lojë të mirë pas gjithë këtyre telasheve që kemi pasur, pasi ka rënë morali për lojë edhe te Kastrioti edhe të Universiteti. Më rëndësi është që zhvillohet finalja dhe kampioni përcaktohet në fushë dhe jo në tavolinë.

Besoj se volejbollistet e mija do të japin maksimumin dhe le të fitojë ajo skuadër që e meriton”, tha Ibrahimi. Ballafaqimi në mes Universitetit dhe Kastriotit do të zhvillohet të martën, me fillim në orën 16.00 në Qendrën e Rinisë dhe të Sportit në Prishtinë. Kryetrajneri i Universitetit, Bahri Gjinovci, tha se për hir të volejbollit ka kërkuar më këmbëngulje që të zhvillojnë ndeshjen në fushë sepse me rregullore është dashur të fitojë në tavolinë zyrtare takimin e pa takimin e parë.

“Të shtunën ka qenë e paraparë ndeshje të zhvillohet, por kryetrajneri i Kastriotit, Abedin Ibrahimi, nuk ka pranuar të luajë në sallën e FShKS-të. Po të shtunën e kemi lutur që të shkojmë në Qendrën e Rinisë dhe Sportit të Prishtinës dhe ta zhvillojmë ndeshjen.

Edhe aty s’ka pranuar, kushedi për çfarë arsye. E kemi thirrur në telefon dhe kemi kërkuar të luajmë në palestrën e sportit në Ferizaj, ku vepron skuadra e tij, as aty s’ka pranuar. Pëlqimi ka qenë nga kryesia, nga volejbollistet që ndeshjen ta luajmë qoftë edhe në Ferizaj, vetëm e vetëm ta fitojmë titullin në fushë dhe jo në tavolinë”, tha Gjinovci.

Kryetrajneri “universitarë” është i bindur se të dy ndeshjet do t’i fitojë sepse ka një fond të shkëlqyeshëm të volejbollisteve. “Kryesia ka investuar shumë dhe kemi kushtet më të mira. Kemi volejbolliste profesioniste dhe mendoj që të martën do të shënojmë fitore pa ndonjë problem”, tha Gjinovci.