Pjesëmarrësi i trefishtë i Lojërave Olimpike, Aziz Salihu, është i gatshëm t’ua shtrijë dorën e pajtimit zyrtarëve të Federatës së Boksit të Kosovës për hatër të boksit të Kosovës. Kështu ka thënë të hënën në një konferencë për shtyp fituesi i medaljes së bronztë olimpike nga viti 1984.

Kjo kthesë në qëndrimet e tij karshi FBOXK-së vjen vetëm një ditë pasi Përfaqësuesja e Kosovës u paraqit në gara ndërkombëtare me përforcime nga Shqipëria. Salihu thotë se Kosova ka boksierë të mjaftueshëm për të bërë një përfaqësuese të fortë pa ndihmën e askujt.

Ai i ka bërë thirrje edhe ministrit të Kulturës, Rinisë dhe Sporteve, Lutfi Haziri, të ndërmjetësojë në pajtimin e klubit Prishtina që udhëhiqet nga ai dhe FBOXK-ja.
“Për hir të boksit të Kosovës jam i gatshëm t’ua shtrij dorën e pajtimit zyrtarëve të FBOXK-së dhe të bashkohemi për të arritur suksese në arenën ndërkombëtare.

I bëj thirrje edhe ministrit Haziri të na bashkojë edhe të mos kemi më përçarje. Duhet të ulemi dhe t’i sqarojmë të gjitha gjërat që nga fillimi”, ka thënë Salihu.
Salihu shton se ndien keqardhje që boksierët e Prishtinës nuk ishin të ftuar në Përfaqësuesen e Kosovës për dy ndeshjet e ligës ndërkombëtare “BoxingOne”, ku Kosova shënoi fitore ndaj dy ekipeve hungareze, Vasas (9:5) dhe Debrecen (8:6). Kontribut të madh në këto dy fitore dhanë katër boksierët e Shqipërisë. Në fakt, në meçin e parë ata fituan 5 nga 9 pikët e Kosovës, kurse në të dytin 7 nga 8 pikët.

“Nuk kam qenë i kënaqur që boksierët nga Shqipëria të përfaqësojnë Kosovën. Nuk është se nuk jam patriot, por ne kemi boksierë të talentuar me bollëk. Gjithmonë kemi pasur”, ka thënë Salihu.
Seleksionuesi i Kosovës, Xhevdet Peci, ka arsyetuar ftesën për boksierët e Shqipërisë me faktin se ata të Kosovës janë të rinj dhe duhet ruajtur.
Zyrtarë të FBOXK-së thonë se dyert e Federatës janë të hapura për çdokënd, përfshirë edhe Prishtinën dhe Salihun.
“Në FBOXK secili i ka dyert e hapura, por çdokush duhet t’i përmbahet rregullores që kemi e që është e njëjtë për të gjithë. Ne jemi të gatshëm të bashkëpunojmë me të gjithë”, ka thënë zëdhënësi i FBOXK-së, Latif Demolli.

Ndërkohë Salihu ka shprehur dëshirën që të kontribuojë edhe në lobim për pranim të FBOXK-së në organizatat ndërkombëtare. Ai thotë se ka emër në botë dhe se kjo duhet të shfrytëzohet.

Zyrtarët e Federatës së Boksit të Kosovës njoftojnë se të shtunën dhe të dielën e kësaj fundjave do të mbahet turneu ndërkombëtar “Dorëza e artë” në boks.

Turneu do të zhvillohet në Shtërpcë dhe pritet të marrin pjesë boksierët nga Mali i Zi, Maqedonia, Shqipëria, Bullgaria dhe boksierët e kombëtares së Kosovës. Turneu fillon të shtunën në orën 12.00, ndërsa po të njëjtën orë edhe të dielën. Sipas zyrës së FBOXK-së, pritet të ketë meçe cilësore, por presim rezultatet më të mira nga boksierët e kombëtares së Kosovës.

Për herë të tretë do të mbahet turneun ndërkombëtar kushtuar trajnerit legjendar të boksit, Lah Nimani.

Krerët e Federatës së Boksit të Kosovës bënë të ditur se ky turne është i treti më radhë dhe do të jetë më madhështor se dy të parët. Turneu mbahet të shtunën, me 29 maj, në Qendrën e Rinisë dhe të Sportit në Prishtinë. Zyrtarët e federatës thonë se janë bërë të gjitha përgatitjet e duhura për këtë turne dhe presin meçe cilësore.

Sekretari i përgjithshëm i FBOXK-së, Mehmet Bogujevci, ka thënë se do të marrin pjesë boksierët nga shtetet e ndryshme për ta nderuar legjendarin e boksit, Lah Nimani, i cili në ish-ligën federative qe bërë pesë herë kampion me klubin e boksit Prishtina. “Përgatitjet për organizimin e këtij turneut shkojnë në mënyrën më të mirë. Boksierët nga tetë shtete kanë bërë edhe konfirmimin që do të jenë pjesëmarrës në turneun e tretë më radhë kushtuar Lah Nimani.

Në turne marrin pjesë: boksierët nga Shqipëria, Bosnja e Hercegovina, Kroacia, Çekia, Mali i Zi, Maqedonia, Novi Pazari si dhe boksierë nga Kosova Lindore. Në çdo kategori presim meçe të cilësisë së lartë që do ta madhështonin këtë turne”, tha Bogujevci.

Ai shtoi: “Në turne përveç boksierëve seniorë, do të boksojnë edhe boksierët e kategorisë së juniorëve. Do të bëjmë këtë përzierje për hir të rritjes së cilësisë. Po ashtu kemi planifikuar edhe dy meçe në konkurrencën e femrave, që shpresojmë do të bëjmë edhe më atraktiv turneun”.

Drejtori i Departamentit të Sportit të Kosovës, Ibër Alaj, tha se është kënaqësi kur mbështetë turne të nivelit të tillë, duke pasur parasysh emrin e legjendarit të boksit, Lah Nimani.

“Është kënaqësi e madhe të mbështetësh organizimin e një turneu kushtuar figurës së ndritshme të boksit të Kosovës. Shpresojmë se do të kemi meçe sa më cilësore, sepse në këtë mënyrë do të nderonim në mënyrën më të mirë trajnerin legjendar Lah Nimani”, tha Alaj.

Edhe përzgjedhësi i kombëtares së Kosovës, Xhevdet Peci, është shprehur optimist se me të përzgjedhurit e tij do të dëshmojë boks të cilësisë së lartë.

“Boksierët janë të përgatitur në çdo pikëpamje dhe besoj se do të dëshmojnë cilësi”, tha Peci.

Sipas tij, prej 1 gushti do të tubohet kombëtarja e Kosovës, kur fillojnë edhe përgatitjet për garat e Euroligës. Peci tha se deri në shtator pritet që të zhvillojnë edhe dy meçe miqësore me kombëtaren e Malit të Zi dhe të Bosnjë e Hercegovinës. /botasot

Kombëtarja e Kosovës në boks ka pësuar dy humbje me rezultat të thellë 11:3 e 12:2 nga klubi i boksit Vasasi përkatësisht Debreceni.

Zyrtarët e Federatës së Boksit të Kosovës para nisjes për në Hungari patën deklaruar se në Budapest nuk do të shkojnë vetëm sa për të marrë pjesë, por do të dëshmojnë traditën e boksin që ka Kosova dhe do të luftojnë për titull. Mirëpo, boksierët tanë dështuan në të gjitha pikëpamjet dhe pësuan dy humbje katastrofë në Budapest dhe kur i shtohet edhe ajo në Prishtinë nga Galante e Sllovakisë, bilanci është tri meçe dhe po aq humbje. Më një fjalë, shkuan për titull, por u kthyen të turpëruar.

Ndërkohë, çudia më e madhe është se pas këtyre humbjeve, ndryshojnë edhe deklaratat e FBOXK-së, duke thënë se Kosova ka boksuar me boksier të rinj, pa përvojë dhe nuk është pritur më shumë. Sekretari i përgjithshëm i Federatës së Boksit të Kosovës, Mehmet Bogujevci, tha se nuk është pritur më tepër. Mirëpo, Bogujevci, është i vetmi zyrtar nga federata që edhe para nisjes nuk ka premtuar rezultate të bujshme në Hungari për dallim nga ekspedita e kombëtares dhe zyrtarë të tjerë të kësaj federate.

“Është normale që kanë humbur. Është ndërrim i gjeneratës dhe nuk është pritur më tepër nga djemtë tanë. Kemi një gjeneratë të re të boksierëve, me një moshë 18-19 vjeçare dhe brenda 3-4 vjetësh premtojnë shumë”, tha Bogujevci. Ai tha se në çastet e fundit i kanë rënë pishman që të përforcohen me boksierë cilësorë.

“Nuk kemi dashur që të përforcohemi sepse më mirë ka qenë të shkojmë më këtë brez të rinj dhe premtues. Duhet të mendojmë për më shumë dhe jo për një kohë të shkurtër. Më rëndësi ka qenë pjesëmarrje, rezultatet fare nuk çojnë peshë sepse është koha të punojmë me të rinj dhe jo të vrapojmë pas rezultateve”, ka thënë Bogujevci.

Mehmet Bogujevci nuk e pranon se ka boksi krizë, por është kategorik se janë duke punuar me të rinjtë më shumë dhe të ardhmen të kanë brumin e gatshëm. Duhet theksuar se boksi ka një krizë të përgjithshme pavarësisht se nuk e pranojnë zyrtarët e FBOXK-së, kur dihet se menjëherë pas luftës kanë pasur ligën e organizuar me tetë klube dhe madje edhe shikueshmëri më të madhe se shumë sporte të tjera me dorë.

Mbahej mend në vitet 2000-2001 kur boksi ka pasur në palestër mbi 3 mijë shikues, ndërsa sot mezi tubon 100-200 shikues. Madje është në krizë edhe të numrit të boksierëve cilësorë, pasi disa nga ta kanë shkuar në shtetet e jashtme për të kërkuar punë dhe siguruar ekzistencën familjare. /botasot

Kreu i Federatës së Boksit të Kosovës ka reaguar shumë ashpër me rastin e arrestimit te ish-boksierit dhe trajnerit të klubit të boksit Gjakova, Bujar Bobani (Buki).

Në komunikatën e federatës thuhet se sipas informatës telefonike të vëllait, Arben Bobani, Bujari është arrestuar nga Interpoli në Aeroport të Munihut të Gjermanisë, i cili ishte duke udhëtuar nga Shtetet e Bashkuara të Amerikës për Tiranë-Kosovë.

Dyshohet se është arrestuar gabimisht pasi vëllai i tij, Arben Bobani, ka qenë i burgosur politikisht dhe i kërkuar nga regjimi shovinist serb. Zyrtarët e kësaj federate janë të tronditur më këtë arrestim dhe kërkojnë që trajneri gjakovarë të lirohet menjëherë.

Kombëtarja e Kosovës në boks ka rinisur përgatitjet në prag të meçit me Galantën nga Sllovakia, e cila zhvillohet me 1 maj në Qendrën e Rinisë dhe të Sportit në Prishtinë.

Në përgatitjet të cilat zhvillohen në palestrën e sportit “Bill Klinton” në Ferizaj stërvitin këta boksierë: Shkëlqim Muja (57 kg), Liridon Zeqiri (60 kg), Burim Hasani (64 kg), Milot Shabani (69 kg), Burhan Zeneli (75 kg), Bujar Sejdiu (81 kg), Kristian Dema (91 kg). Me boksierë punon përzgjedhësi Xhevdet Peci, i cili është optimist se do të fitojnë kampionatin në BoxingOne Championship. Synimi i kombëtares është që të shënojmë fitore në hapje të këtij kampionatit.

Zyrtarët e Federatës së Boksit të Kosovës njoftojnë se është mbyllur konkursi për përzgjedhës të kombëtares së Kosovës në boks.

Sipas zyrës së FBOXK-së, kandidaturën për përzgjedhës e kanë paraqitur dy kandidatë. Xhevdet Peci, aktualisht drejtor i kombëtares së Kosovës, si dhe Musli Zymberi, i cili udhëheq KBO Drita nga Gjilani. Është pritur një numër më i madh që të konkurrojnë për përzgjedhës, megjithatë, kjo nuk ndodhi.

Peci ka qenë ish-boksier i gjeneratës së artë të KBO Prishtina dhe që ka gjasa që të emërohet përzgjedhës i ri, por pa gjasa nuk është edhe Zymberi. Përzgjedhës aktual është Mehmet Haxhani, i cili nuk ka konkurruar që të rizgjidhet në këtë post. /botasot

Përzgjedhësi i tashëm i kombëtares së Kosovës në boks, Mehmet Haxhani, as që mërzitet pse Federata e Boksit e Kosovës e ka shpallur konkursin për përzgjedhës të ri të boksit.

Haxhanit i ka kaluar mandati katërvjeçar dhe tashmë, sipas Rregullores së Federatës së Boksit të Kosovës, përzgjedhësi duhet të zgjidhet me konkurs. Haxhani tha se ka dëgjuar për këtë konkurs dhe sipas tij është vendim i drejtë i FBOXK-së, sepse ashtu është edhe me rregullore.

“Natyrisht se është dashur të shpallet konkursi, sepse më ka skaduar mandati. Prandaj këtu nuk ka asgjë të keqe, por shumëçka është korrekte”, deklaroi Haxhani.

Ai tha se do të mendojë gjatë se a do të konkurrojë për përzgjedhës apo do të tërhiqet krejt nga boksi. “Sigurisht se do të mendoj të konkurroj apo të tërhiqem nga boksit. Më rëndësi është se me punën time deri më tash ka qenë e kënaqur Federata dhe jam krenar që kemi arritur rezultate të mira në garat ndërkombëtare.

Rezultatet e mia të fundit janë nga Podgorica, ku fituam dy medalje (një të artë dhe një të argjendtë)”, tha Haxhani. Përzgjedhësi që katër vjet është në krye të kombëtares së Kosovës dhe për kaq vite ai nuk ia ka pa hairin aspak këtij profesionit. “Beso që katër vjet asnjë centi nuk e kam marrë nga Federata e Boksit të Kosovës.

kam qenë përzgjedhës pa pagë, por çka është më së interesanti edhe kur kemi pasur rezultate nuk jam shpërblyer asnjëherë me të holla. Unë më shumë kam punuar për hir të boksit dhe për të rritur cilësinë e këtij sporti.

Kështu që, për katër vjet sa kam qenë përzgjedhës një centi nuk ka hyrë në xhep timin, përveç që sa herë kam udhëtuar nga Mitrovica është dashur të jap nga dhjetë euro për shpenzimet e rrugës dhe të ushqimit”, tha Haxhani. Kreu i Federatës së Boksit të Kosovës nëpërmjet një komunikate ka bërë të ditur se kandidati për përzgjedhës duhet të ketë të kryer fakultetin e kulturës fizike dhe të sportit, ose shkollën e lartë të kulturës fizike dhe të sportit.

Po ashtu të jetë i trajner i diplomuar i boksit, të jetë i licencuar nga FBOXK-ja për trajner dhe njohës i mirë i boksit në Kosovë. Këto janë disa nga kushtet që duhet t’i plotësojnë të gjithë ata kandidatët që konkurrojnë për përzgjedhës. /botasot

Bordi i Federatës së Boksit të Kosovës, zgjodhi edhe disa nga organet drejtuese në federatë. Kryetar i Komisionit të Garave i FBOXK-së është zgjedhur Latif Demolli, ndërsa kryetar i Komisionit disiplinor emërohet Elhami Bajrami.

Në Këshillin mbikëqyrës do të jenë: Xhemail Buzuku, kryetar, Bahri Tahiri dhe Ramë Uka. Në këshillin profesional do të jenë: Xhevdet Peci, kryetar, Mehmet Haxhani, Nazif Gashi, Shefki Bogujevci dhe Agron Kamberi.

Sekretari i përgjithshëm i federatës është rizgjedhur Mehmet Bogujevci. Zyrtarët e kësaj federate u zotuan se viti 2010 do të jetë më i mirë dhe do të ketë më shumë rezultate.

Dashamirët e boksit me padurim presin mbajtjen e Kuvendit zgjedhor të Federatës së Boksit të Kosovës dhe të shohin se kush do të jetë në mandatin e ardhshëm katërvjeçar. Merret vesh zyrtarisht se kandidati i parë për kryetar është kryetari i tashëm, Ramadan Selimi.

Sipas zyrtarëve të federatës thuhet se deri të martën në orët e vona të pasdites askush tjetër nuk e ka paraqitur kandidaturën për kryetar të federatës. Sipas burimeve brenda federatës pritet të shtunën të dalë ndonjë kundërkandidat ndaj kryetarit aktual, Selimit.

Me gjithë përpjekjet e pareshtura nuk kemi mundur të kontaktojmë kryetarin Selimi, i cili veç ka paraqitur kandidaturën. Nga ana tjetër, ish-boksieri i mirënjohur, Aziz Salihu thotë se e ka paraqitur kandidaturën për kryetar, por sipas tij, iu është refuzuar.

“Më kanë refuzuar kërkesën gjoja se klubi Prishtina nuk është i regjistruar në federatë dhe nuk i ka përmbushur kriteret. Unë kam kërkuar që kandidatura ime të pranohet zyrtarisht sepse jam sportist i merituar.

Ata nga frika se po e humbin garën për kryetar nga Aziz Salihu, më bëjnë të pamundur që të jem në garë për kryetar. Unë do të luftojë më të gjitha mjetet që kam në dispozicion për të qenë kandidat për kryetar sepse edhe ligji më lejon një gjë të tillë për arsye se kam qenë sportist i merituar. Kam bërë shumë për sportin e Kosovës në veçanti për boksin.

Askush nuk mund të ma mohojë kandidaturën për kryetar, as të më ndalojë që të jem pjesëmarrës në kuvend, por do të jem këmbëkryq në kuvendin zgjedhor”, ka thënë Salihu. Zyrtarët e Federatës së Boksit të Kosovës nuk kanë pranuar asgjë të thonë, përveç që kanë deklaruar se i vetmi kandidat deri më tash është Selimi.

Sipas federatës, kuvendi mbahet të shtunën, më 23 janar, në orën 12.00 dhe delegatët do të zgjedhin kryetarin e ri. Salihu këmbëngul se do të shkojë dhe sipas tij ka edhe një numër të madh të votave që i ka siguruar për vete.

Ai nuk pranon që t’i jap emrat e klubeve që e mbështesin për kryetar, por është i bindur se do të fitojë garën për kryetar të federatës. Sipas burimeve jozyrtare, flitet se kuvendi mund të mbahet edhe nën masa të forcave të Sigurimit privat për të mos lejuar ndonjë të keqe që mund të ndodh para kuvendit.

Kuvendi po ofrohet, ndërsa po ashpërsohet lufta për kryetar megjithëse Salihu ende nuk e ka të paraqitur kandidaturën me shkrim në federatë.