Prishtina dhe Besa janë finalistë të Kupës së Kosovës në futboll. Bardhekaltrit e kanë eliminuar në gjysmëfinale Gjilanin, kurse pejanët iu hakmorën Lirisë, të cilën e mposhtën në duelin e dyfishtë.

Besa dhe Prishtina do të luajnë në finale të Kupës së Kosovës në futboll, pasi në gjysmëfinale ishin më të suksesshëm se Liria, respektivisht Gjilani. Pejanët kanë fituar në duelin e dyfishtë ndaj prizrenasve. Ata e administruan mjaft mirë fitoren e shënuar në Prizren, duke fituar edhe të mërkurën në Pejë me rezultat 3:1.

Dukagjin Gashi e ka kaluar ekipin vendës qysh në minutën e 13-të, pas një goditjeje të lirë nga distanca. Ekipi i Valdet Shoshit e ngriti avantazhin në minutën e 34-t përmes Bernard Berishës, i cili u shërbye nga Haxhi Zeka.

Dy minuta më vonë, mysafirët e patën mundësinë që ta ngushtonin epërsinë e vendësve, por Rafet Mullallari dështoi nga penalltia, pasi më i suksesshëm ishte portieri pejan Valmir Bytyqi. Prizrenasit e zbutën rezultatin në minutën e 60-të me anë të të riut Dobroshi.

Kurse vulë këtij takimi i dha kapiteni i Besës, Haxhi Zeka, i cili me një parabolë shënoi golin e tretë për mikpritësit, 13 minuta pa përfunduar takimi. Besa iu hakmor si është më së miri Lirisë, e cila e eliminonte nga gjysmëfinalja në dy përballjet e fundit.

Ndërkohë, Prishtina u tregua e sigurt ndaj Gjilanit, të cilin e mposhti 3:1. Bardhekaltrit e gjetën golin e parë qysh në minutën e dytë, pas një goli fantastik të Isuf Llumnicës. Rastet që lëshuan vendësit në vazhdim u kushtuan përkohësisht, pasi Feriz Frangu i gjilanasve i barazoi shifrat në minutën e 33-të.

Por, për ta çuar Prishtinën në finale u përkujdes mesfushori Llumnica, i cili ishte njeriu i ndeshjes. Përpos golit, ai asistoi në dy golat tjerë, të cilët i shënuan Astrit Fazliu (18’) e Suad Saliagiq (83’). Ndërkohë, vendësit goditën tërthorësen dy herë me anë të shënuesve Fazliu e Saliagiq.

Kupa e Kosovës

Gjysmëfinalja
Besa – Liria 3:1 (1:0)
Prishtina – Gjilani 3:1 (1:1)
Në kllapa, rezultatet e ndeshjeve të para

Për gati një dekadë, skuadrës së Besës është duke i prirë, trajneri dhe ish-futbollisti i njohur gjakovar, Genc Hoxha.

Ai me Besën ka arritur rezultate impresive, duke qenë kampion e nënkampion, në finale të Kupës dhe duke vazhduar përherë punën me të rinj për të arritur stabilizim të plotë në futbollin e Kosovës. Në një bisedë që zhvilluam për lexuesit e “Bota Sot”, ai vlerëson stinorin e sapopërfunduar, duke potencuar se në punën e tij nuk ka përzierje kompetencash siç ngjet në disa klube të tjera.

BS: Si e vlerësoni këtë edicion ?

G. Hoxha: Gjatë këtij viti kemi qenë skuadër stabile, kemi pasur paraqitje të mira dhe besoj që kemi luajtur rol të rëndësishëm në futbollin e Kosovës.

BS: Edhe këtë herë pa trofe ?

G. Hoxha: Në fillim të këtij kampionati qëllim i kemi pasur lojërat e mira dhe nuk i kemi hyrë garës me çdo kusht për pozitën e parë. Ndërkaq, në ndeshjet për kupë, në ballafaqim me Lirinë nuk u paraqitëm si herëve tjera.

BS: Pozita e katërt me meritë apo me fat ?

G. Hoxha: Me plotë meritë kemi arritur në pozitën e katërt dhe me pak fat, do të mund të fitonim edhe kampionatin.

BS: Kryesia dhe autonomia jote në punë ?

G. Hoxha: Kam pasur autonomi të plotë, unë jam ai që vendosi edhe për fondin e lojtarëve. Së bashku me komisionin që caktohet nga klubi, hartojmë programe e koncepte dhe në bazë të mjeteve materiale, të cilat i disponojmë, vendosim për përforcime të mundshme, ndonëse fillimisht orientohemi nga radha e juniorëve. Kjo formë është treguar e suksesshme, të paktën deri me tash, sepse edhe në këtë edicion kemi inkuadruar mjaftë të rinj nga grup-moshat e shkollës së Besës.

BS: Futbollistët, cili u dallua më së shumti ?

G. Hoxha: Edhe pse më i moshuar se të tjerët, kapiteni Haxhi Zeka, është lojtari më i dalluar. Ai mirë i ka prirë skuadrës edhe në këtë edicion, natyrisht duke komplementuar edhe lojën dhe barrën e të tjerëve që bartën, për të gjetur kënaqësinë dhe shpresën tek të rinjtë që janë e ardhme e ekipit tonë.

BS: Rivaliteti dhe korrektësia ?

G. Hoxha: Rivaliteti në këtë vit ka qenë më i madh, pasi në saje të zvogëlimit të ligës, në çdo rreth patëm nga dy – tri ndeshje derbi. Korrektësia këtë herë ishte për lakmi, ne si skuadër jemi shumë të kënaqur pasi në çdo vend kemi kaluar mirë. Për të spikatur është numri i shikuesve jo i mjaftueshëm qoftë në Pejë apo edhe në mjedise të tjera. Prandaj, po qe se kemi ngritur cilësinë, kjo nuk mohohet nga askush, mendoj që është koha e ndryshimeve për terminet e ndeshjeve që shikuesit t’i ofrojmë mundësinë kur ai gjënë mundësi e disponim të vijë në stadium.

BS: Atëherë sa ju ndihmuan ata në arritjen e objektivit ?

G. Hoxha: Ata që na kanë ndjekur vazhdimisht na kanë dhanë përkrahje, por thash se nuk jemi të kënaqur me numrin e tyre. Dëshirojmë që ne vazhdim të ketë rritje të shikuesve në shkallët e stadiumit. E kuptoj që ai më nuk do të vie vetëm sa për të bërë tifo, por kërkon edhe të relaksohet, zbavitet dhe të ndjehet mirë në një stadium sikurse që e bën aktivitetin edhe në natyrë, për ç’gjë Peja është e njohur. Mirëpo, meqë, siç kam dëgjuar, shumë shpejtë do të fillojnë ndërtimet në stadium, për të cilin thonë se do të jetë i përmasave evropiane, atëherë pejani nuk do të ketë arsye të mos vij në stadium.

BS: Strategjia ?

G. Hoxha: Strategjia e Besës është që vazhdimisht të qëndroi në krye të futbollit të Kosovës. Moto jona është puna jo vetëm me seniorë, por edhe me grupmoshat e reja, në mënyrë që pejanin të mos e largojmë aq lehtë nga qyteti, siç na ka ndodhur me të tjerë, rasti i Beqirajt në Podgoricë apo edhe të ngjashme. Me këtë dua të them se Kosova një ditë do të jetë në FIFA dhe se futbollistët nuk do të mund të lëvizin pa dëmshpërblim që sot kjo çështje është thembër e akilit në futbollin tonë.

BS: Zhgënjyet ndonjëherë me lojë ?

G. Hoxha: Jo! Loja është diçka tjetër, kurse rezultati kaptinë në vete. Pra, nuk do të thotë nëse luan mirë edhe të fitosh, mendoj se luajtëm dhe u paraqitëm shumë mirë sivjet, kuptohet duke e përjashtuar takimin me Lirinë, për garat e Kupës. Ndoshta e kemi zhgënjyer publikun tonë me disa rezultate, por kujtoj se duhet të pajtohemi me realitetin dhe forcën që patëm. Fundja, Besa kudo u prit si ekip i fortë, sikurse që ishte edhe rasti në ndeshjen e fundit në Mitrovicë.

BS: Trepça doli kampione, ndërkaq Liria fitoi Kupën, reale kjo ?

G. Hoxha: Si Trepça, e cila në të shumtën e kohës ka qenë në krye të tabelës, ashtu edhe Liria deri te këto rezultate kanë arritur me meritë. Trepça ka krijuar një skuadër me emra të njohur, ndërkaq Liria ka eliminuar skuadra cilësore si Hysi, Prishtina e Besa. Ka ekipe të tilla që mbase pretendojnë se ato kanë mundur të jenë në vendin e tyre, por realiteti është ky.

BS: Kur jemi te emrat, të mbetët merak për ndonjërin që ta sjellësh në skuadrën e Besës ?

G. Hoxha: Nuk do doja t’i përmendja tani.

BS: Do të qëndroni në klub apo mbaruat punë ?!

G. Hoxha: Më Besën më lidhin shumë kujtime. Tashmë Peja është bërë vendlindja ime e dytë. Jam adaptuar në këtë rreth, në momente ndoshta edhe më mirë se në Gjakovë. Kur klubi, qyteti dhe tifozi të qëndrojnë afër, cila është arsye të ikësh? Nëntëdhjetë e nëntë për qind do të mbes te Besa, përkundër disa ofertave që i kam. /botasot

Futbollistët e KEK-ut nga Kastrioti mposhtën kryesuesin e tabelës Trepçën nga Mitrovica me rezultat 1:0, në kuadër të ndeshjes së javës së 32-të të Raiffeisen Superligës së Kosovës në futboll.

Futbollisti Arsim Plepolli ka qenë kreatorë i fitores së KEK-ut me golin që ka shënuar në minutën e 90-të të takimit. Trepça me gjithë humbjen që ka pësuar gjasat për ta fituar titullin i ka 99 për qind, pasi në ndeshjen e fundit luan në shtëpi kundër Besës nga Peja.

KEK-u ka tubuar 53 pikë dhe iu është afruar për tri pikë Trepçës, e cila në javën e fundit pret ta kremtojë edhe zyrtarisht titullin e kampionit. Vëllaznimi i Gjakovës dalëngadalë ia doli të ngjitet në vendin e nëntë në tabelë me 39 pikë, duke e futur për fundi Ferizajn.

Gjakovarët në saje të gol-dallimit më të mirë kaluan ferizajasit në tabelë dhe në javën e fundit do të qartësohet shumëçka se kush do të luan në barazh, Vëllaznimi apo Ferizaj. Skuadra e Vëllaznimit ia doli të kthehet me tri pikë si udhëtues nga Gjilani, duke shënuar fitore me rezultat 1:0. Ndërkaq, Ferizaj pësoi debakël në Pejë nga Besa me rezultat 3:0. Ferizaj në ndeshjen e fundit me Gjilanin duhet të kërkojë gjithsesi fitore ndaj Gjilanit, i cili është përshëndetur tash e sa javë nga elita e futbollit.

Fitore interesante ka arritur Prishtina në Merdare ndaj Hysit dhe ka shtuar gjasat qind për qind në luftë për vendin e dytë. Prishtina fitoi me shifra 2:1 dhe ka mundësi në javën e fundit nëse mposhtin KEK-un të bëhen nënkampion të Kosovës.

Flamurtari në shtëpi shënoi fitore për përmirësimin e bilancit në ballafaqim me Kosovës që është dorëzuar edhe përfundimisht dhe pajtuar më rënie nga elita e futbollit. Liria e Prizrenit është mundur me rezultat minimal 0:1 nga Drenica e Skenderajt. Ky ka qenë edhe rezultat më befasues i javës së 32-të, njëherësh Drenica është ngjitur në vendin e shtatë në tabelë me 46 pikë të grumbulluara.

Ndeshjet e javës së fundit zhvillohen me 30 maj dhe do të dihet edhe zyrtarisht kampioni i ri i Kosovës. Përveç dilemës që mbetet së kush do të luajë në barazh, nga liga do të largohen Kosova e Vushtrrisë, Gjilani, ndërsa nga kampionati i ardhshëm anëtari të ri të elitës do të janë Trepça ’89 nga Mitrovica dhe Ballkani i Therandës.

Rezultatet

Besa-Ferizaj 3:0

KEK-u-Trepça 1:0

Hysi-Prishtina 1:2

Liria-Drenica 0:1

Flamurtari-Kosova 4:2

Gjilani-Vëllaznimi 0:1

Tabela

1. Trepça 32 14 11 6 44:26 56

2. KEK-u 32 15 8 9 50:32 53

3. Prishtina 32 15 7 11 37:33 52

4. Besa 32 15 6 11 43:26 51

5. Hysi 32 14 5 13 50:39 47

6. Flamurtari 32 12 11 9 41:41 47

7. Drenica 32 13 7 12 36:43 46

8. Liria 32 12 8 12 38:34 44

9. Vëllaznimi 32 11 6 15 31:41 39

10. Ferizaj 32 11 7 14 26:43 39

11. Kosova 32 8 7 17 27:43 31

12. Gjilani 32 5 10 17 27:51 26

Në javën e 33, më 30 maj takohen: Ferizaj-Gjilani, Vëllaznimi-Flamurtari, Kosova (V)-Liria, Drenica-Hysi, KEK-u-Prishtina dhe Trepça-Besa. /botasot

Dinamo ka festuar me fitore ngritjen zyrtare të trofeut të kampiones, teksa ka mundur Besën 4:3 në “Qemal Stafa“.

Ndeshja përmbyllëse e këtij kampionati, që fare pak ka dhuruar emocione dhe cilësi sportive, ndërkohë që me shumicë ka prodhuar dukuri tejet negative, si dhuna, trukimet, përfoljet, akuzat e kundërakuza, të cilat nuk kanë asgjë të përbashkët me lojën e bukur dhe magjike të futbollit.

Kesisoji, te merkuren e 19 majit 2010, u luajtën ndeshjet e javës së fundit të superligës. Të cilat zbuluan edhe verdiktet e fundit të një kampionati shumë të përfolur, për t’u harruar, “estradës” së të cilit nuk i shpëtuan edhe ndeshjet e kësaj të mërkure. Ku spikat fitorja e Teutës në “Loro Borici”, ndaj Vllaznisë vendase, që nuk dukej fare e impenjuar, duke mos u prishur punë “djemve të detit”, të cilët, nëse nuk fitonin, do t’i nënshtroheshin “play-out”-it.

Gramozi, i rënë prej disa javësh në kategorinë e parë, ka tërhequr pas vetes edhe Apoloninë e Fierit, falë fitores së ndeshjes direkte në Ersekë, 3:0. Skuadra fierake nuk ka mundur dot t’i shmanget humbjes në ndeshjen e fundit të kampionatit, për të ushqyer ato shpresa të pakta që kishin për mbijetesë, sepse kolonjarët nuk kanë falur.

Në këtë mënyrë, Apolonia e shikon veten një kategori më poshtë, duke lënë elitën e futbollit shqiptar, që mban emrin superligë. Teuta, falë fitores 2:0 në Shkodër, ka siguruar direkt mbijetesën, duke i shpëtuar “provimit të vjeshtës”, ndeshjes shtesë së “play out”-it. Në këtë “stacion” kanë mbetur dy skuadra, Skënderbeu i Korcës dhe Kastrioti i Krujës.

Që do të ballafaqohen me dy skuadra të kategorisë së parë të këtij edicioni, për të diskutuar për herë të fundit mbijetesën në superligë. Konkretisht, Kastrioti, që ka mundur 1:0 Lacin në javën e fundit, do të ndeshet me Lushnjën, në “play-out”, ndërsa Skënderbeu, që barazoi 2:2 me Tiranën në javën e fundit të garës, do të ballafaqohet në “play-out” me Kamzën.

Ndeshje të cilat do të luhen më 26 dhe 27 maj, në kryeqytet, javën e ardhshme. Vec Dinamos, që është shpallur kampione, edhe pse ka regjistruar plot 8 humbje radhazi në fazën e tretë, vec Besës, që është shpallur nënkampione dhe fituese e Kupës së 58-të të Shqipërisë, Tirana ka zënë vendin e tretë, duke parakaluar me 1 pikë më shumë Lacin, që fiksohet përfundimisht në vendin e katërt.

Të gjitha këto skuadra (Dinamo, Besa, Tirana dhe Laci) do të marrin pjesë në Kupat e Europës, blutë në Ligën e Kampioneve, ndërsa tri skuadrat e tjera në “Europa League”.

Flamurtari, që ka mundur 3:2 Shkumbinin në “aktin” e fundit të këtij kampionati, ka zënë vendin e pestë në klasifikim, duke bërë një kapërcim të madh në këtë fazë të tretë, teksa luftonte për mbijetesë, por e shikon veten në mesin e artë, në fund të garës.

Ja edhe pasqyra e plotë e javës së 33-të të superligës.

Kategoria Superiore

Java 33 (e fundit)

Skenderbeu – Tirana 2:2 (1:0)

Shënues: Nestorovic 2′, Cajku 48’ / Abilaliaj 46’, Sorra 49’

Vllaznia – Teuta 0:2 (0:0)

Shënues: Mile 47’, 50′

Flamurtari – Shkumbini 3:2 (1:0)

Shënues: Shehaj 30′, Lena 85’, Memelli 90′ / Branica 91′, Gjyla 93′

Kastrioti – Laci 1:0 (0:0)

Shënues: Kalari 78’

Gramozi Apolonia 3:0 (2:0)

Shënues: Dos Santos 16′, 53’, Metani 37′

Dinamo – Besa 4:3 (1:1)

Shënues: Kuli 41’, Sefa 64’, 82’, Bakaj 69’ / D.Xhafaj 17’, Poci 52’ (pen), Mancaku 64’

Ndeshjet e para të gjysmëfinales së Kupës së Kosovës në futboll kanë pasur rrebesh gola. Në Pejë janë shënuar gjithsej gjashtë gola (Besa-Liria 3:3), ndërsa pesë gola në Gjilan (Gjilani-Vëllaznimi 2:3).

Për dy ndeshje të zhvilluar u shënuan 11 gola, çka dëshmoi një efikasitet të lartë të sulmuesve. Liria mori barazim në Pejë me Besën, ndërsa Vëllaznimi nga Gjakova shënoi fitore me rezultat 3:2 në Gjilan kundër Gjilanit. Si Liria po ashtu edhe Vëllaznimi arritën rezultat të favorshëm për ndeshjen e kthimit, të cilat zhvillohen pas dy jave përkatësisht me 26 maj.

Në takimin Besa-Liria ka qenë ndeshje dramatike sa i përket rezultatit po ashtu edhe i ka mbajtur edhe ata pak shikues (300-sish) në ankth. Liria në fund të pjesës së parë kaloi në epërsi me rezultat 0:1 me golin e bukur nga rreth 20 metra që ka shënuar futbollisti Rafet Mullallari.

Në pjesën e dytë, ndryshuan gjërat dhe pejanët vërsulen më të gjitha forcat në barazimin e rezultatit, të cilën e arritën në minutën e 54-të falë golit të futbollistit Granit Çekajt. Nuk kaluan as 11 minuta lojë dhe Besa kaloi në epërsi. Blerim Hysenlekaj nga rreth 20 metra dërgon një gjuajtje të fortë dhe shënon gol të bukur, duke kaluar skuadrën e tij në epërsi me shifrat 2:1.

Liria assesi nuk dorëzohet, por merr veten me lojë të mirë. Në minutën e 76-të të ndeshjes, Fati Karahoda pas një veprimit të mirë barazoi shifrat 2:2. Besa vazhdon me raste të shumta nëpërmjet Egzon Gashit e Blerim Hysenlekajt, të cilët sikur t’i konkretizonin të gjitha rastet, sigurisht se pejanët edhe do të fitonin përballjen dukagjinase.

Fetim Kasami në minutën e 85-të shënoi për epërsinë 3:2 për pejanët. Kur dukej se Besa siguroi një fitore minimale, ngjau e kundërta. Ermir Gjananoviq prishi gëzimin e pejanëve, duke shënuar golin e barazimit pikërisht në minutën e 88-të.

Liria arriti të luajë baras 3:3 dhe e pret ndeshjen e kthimit në Prizren me rezultat paksa më të favorshëm. Gjilani në vatër të vet është mposhtur nga Vëllaznimi me shifrat 2:3 dhe vështirë do të ketë për ndeshjen e kthimit. Vëllaznimi ka bërë një hap të madh drejt finales së kupës së Kosovës, por që e pret edhe një ndeshje pas dy jave në Gjakovë. Skuadra e Gjilanit nuk do të thotë se ka humbur të gjitha gjasat, pasi janë edhe 90 minuta lojë në ndeshjen e kthimit në Gjakovë.

Besa “përmbys“ me rezultat 2:1 Vllazninë, duke e dërguar në Kavajë Kupën e 58-të të Shqipërisë. Falë kualiteteve më të mira që kishte në gjirin e saj, të cilat kanë sfiduar shpirtin e garës dhe dëshirën e madhe, madje edhe të sforcuar të kuqebluve, për ta marrë këtë trofe.

Nuk kanë mjaftuar vetëm 90 minuta lojë për ta përcaktuar fituesen e kësaj finaleje, por më shumë se kaq, 120 minuta, të cilat i kanë mbajtur të mbërthyera me emocione të shumta tifozët e shumtë në stadiumin “Qemal Stafa“, nga të dyja qytetet, që kanë prodhuar një dekor të mrekullueshëm.

Por të gëzuar, në fund të gjithckaje, kanë dalë kavajasit, ndërsa kuqeblutë kanë ikur drejt qytetit të tyre, Shkodër, të hidhëruar për verdiktin e finales, por ndoshta jo aq nga cfarë ka dhënë skuadra e tyre në fushën e blertë. Sidoqoftë, kupa ka shkuar në Kavajë, për herë të dytë në historinë e futbollit të këtij qyteti.Ndeshja ka nisur e kujdesshme për të dyja palët, të cilat studiojnë në fillim njëra-tjetrën.

Por vetëm 5 minuta lojë janë dashur të kalojnë, që Besa të tregojë fytyrën e saj më kualitative dhe kërkuese drejt portës së Grimës. E cila kalon momente të vështira, bashkë me prapavijën kuqeblu. Eshtë goleadori i njohur shkodran, por që luan në radhët e Besës, Vioresin Sinani, ai që e mban në alarm Vllazninë. I kudondodhur, tepër kërkues dhe me një dëshirë të madhe për të shënuar, Sinani e detyron mbrojtjen e Vllaznisë t’i përvishet një pune tepër të madhe për ta neutralizuar.

Madje vë në prove edhe portierin kuqeblu, Grima, pas një gjuajtjeje predhe, rreth 25 metra larg, që do të përfundonte në rrjetë, nëse zgjatja e stërmundimshme e gardianit të Vllaznisë nuk do të ishte në kohën e duhur. Minutat kalojnë dhe Besa mbetet në ofensivë, ndërsa kuqeblutë janë jo shumë të qartë. Nëse te kavajasit ka një Shkëmbi, që dirigjon lojën e të tijve, që fut topa tepër të rrezikshëm në zonën e shkodranëve nga goditjet standarde, te Vllaznia mungon një “busull“ e tillë. Mundohet të bëjë dicka Belisha, por gjendet shpeshherë në darën e menjëhershme të Mihanit, Mancakut dhe Pocit, që zotërojnë mesfushën.

Në kahun tjetër, Bala dhe Shtupina lëvizin shumë, por gjithsesi mbeten të parrezikshëm për kuadratin e Shehit, falë mbrojtjes kavajase, që është në lartësinë e duhur. Me rezultatin e bardhë 0-0 përfundon pjesa e parë, ndërkohë që e dyta nis me një ritëm tjetër të Vllaznisë. E cila shikon më shumë drejt portës kavajase, shton forcat sulmuese dhe mendon më shumë për golin. Besa, nga ana e saj, vijon të qarkullojë dendur dhe shpejt topin, duke e detyruar Vllazninë të harxhojë mjaft energji për t’u vënë në zotërim të sferës.

Derisa do të vinte minuta e 63-të, kur Nallbani ekzekuton një goditje dënimi nga e majta e sulmit shkodran. Topi i goditur prej tij gjen kokën e Balës, i cili, duke iu vjedhur mbrojtjes kavajase, por i mbajtur në pozicion të rregullt nga Dragusha, realizon golin e parë të finales. Tifozëria kuqeblu është në delir, ndërsa ajo kavajase shokohet. Por nuk dekurajohen lojtarët e Besës në fushën e lojës, as trajneri Duro në stolin verdhezi, që nis ndërrimet e duhura dhe shton presionin në prapavijën kuqeblu.

Derisa e detyron mbrojtësin Kraja, nën presionin e Arapit, në një dyluftim ajror me kokë në zonën e portës së Grimës, ta dërgojë topin në rrjetën e tij. Rezultati barazohet, kur kishin mbetur vetëm 5 minuta nga përfundimi i ndeshjes, pikërisht kur shkodranët thuajse kishin filluar festën. E cila nuk ishte e thënë të bëhej në këtë mbrëmje, sepse koha shtesë i ka buzëqeshur Besës së Kavajës. Qe në minutën e 98-të, në shtesën e parë prej 15 minutash, ka gjetur edhe golin e fitores, me anë të Dhëmbit.

Pas një hezitimi të mbrojtjes kuqeblu, Poci gjendet i vetëm me Grimën, gjuan fort, por topi përplaset në trupin e numrit një të Vllaznisë. Sfera kthehet sërish në lojë, tek koka e Dhëmbit, i cili dikur afër pikës së penalltisë, me portën e boshatisur, me Grimën të dalë përpara, realizon golin e suksesit dhe të fitimit të trofeut. Minutat e mëpastajme janë një sforco e Vllaznisë për të barazuar, por pa mundur dot, edhe pse iu afrua kësaj gjëje. Vetëm ndërhyrjet vendimtare të Shehit, në dy raste, e kanë ruajtur të paprekur fitoren 2:1 për Besën, e cila e dërgon kupën në Kavajë.

Ishte Presidenti i Republikës, Bamir Topi, i pranishëm gjatë gjithë ndeshjes në tribunën VIP, ai që ia dorëzoi kapitenit të Besës, Orges Shehi, trofeun e kupës, në shoqërinë e presidentit të Federatës Shqiptare të Futbollit, Armand Duka. Kujtojmë se Besa e ka fituar Kupën e Shqipërisë edhe në vitin 2007, teksa mundi në finale 3:2 me Teutën, duke fituar për herë të parë trofeun.

Me fitimin nga ana Besës së Kupës së Shqipërisë u konfirmuan edhe ekipet që do të marrin pjesë në Europë për sezonin e ardhshëm. Dinamo, kampione, në Ligën e Kampioneve. Besa, fituese e Kupës së Shqipërisë në Ligën e Europës dhe po në këtë kompeticion do të marrin pjesë Laçi e Tirana, që ndajnë vendet 3 dhe 4.

BESA – VLLAZNIA 2:1 – 1:1 (0:0)

Gjyqtar: C.Sferin (Slloveni).

Shënues: Kraja 85’ (aut), Dhëmbi 98’ / Bala 63’

Kartonë të verdhë: Mihani, Vrapi, Smajli

BESA: Shehi, Dragusha, Vrapi, Arapi, Fagu, Shkëmbi, Poci (Babamusta 113’), Mancaku (Dhëmbi 67’), Mihani, Sinani (Hasalla 79’), D.Xhafa. Trajner: Shpëtim Duro

VLLAZNIA: Grima, Rajovic, Kraja, Doci (Alikaj 100’), Nallbani, Belisha, Osja (Haxhibulic 94’), Smajli, Shtupina, Feniks (Djepaxhia 97’), Bala. Trajner: Edi Martini

Karateistët tanë edhe në Gjermani mrekulluan me rezultate të mira. Klubi karatesë Besa nga Lluzhani, KK Llapi, “SKG Kosova” nga Gjermania dhe “Bomolla” nga Suedia fituan së bashku gjithsej 28 medalje në Kampionatin Botëror te Federatës E.I.K.O.

Klubet e karatesë Besa-Lluzhan dhe KK Llapi garuan se bashku dhe dëshmuan cilësi të lartë sidomos Besa Lluzhani ka fituar 13 medalje (pesë të arta, tri të argjendta e pesë të bronzta.

KK Llapi fitoi një të artë dhe një të argjendtë. Në këtë kampionat shkëlqeu karateisti i njohur llapjan, Zekë Nuredini dhe karateistja Ardiana Ejupi, njoftojë Isak Curri, trajner i KK Besa nga Lluzhani.

Atleti Meriton Hasanaj i klubit të Besës së Pejës në disiplinën 1000 metra theu rekordin me rezultat 2:30.95 minuta, ndërsa atletja Gresa Bakraçi (Besa) barazoi rekordin e Diana Qehaja në disiplinën 1000 metra me rezultat 3:08.00.

Këto rezultatet të këtyre atletëve janë arritur në Mitingun e hapur në Atletikë, që u mbajt sot në stadiumin e KF Trepça. Hasanaj dëshmoi se është njëri prej atletëve më të mirë në Kosovë, ndërsa Bakraçi është perspektiv e atletikës dhe që pritet shumë prej saj.

Prishtina është kthyer në formë në javët e fundit dhe ka hapur luftën për ta mbrojtur titullin e kampionit. Fitorja 3:0 kundër Drenicës, pastaj në Pejë me Besën 1:0 dhe së fundi mposhti edhe Trepçën me shifra 1:0 e futën Prishtinën në garë për mbrojtjen e titullit të kampionit.

Tri fitore radhazi e bënë Prishtinën të kthejë shkëlqimin ashtu si i ka hije dhe tashmë në Ferizaj i ka të gjitha mundësitë t’i importojë edhe tri pikë të reja, në kuadër të ndeshjes së javës së 25-të të Raiffeisen Superligës. Prishtina renditet e pesta me 36 pikë, ndërsa Ferizaj është i nënti me 31 pikë.

Ferizaj është i rrezikuar për rënie nga liga dhe mëton gjithsesi fitore pas tri humbjeve radhazi.

“Mendoj se do të jetë ndeshje shumë e vështirë, duke e pasur parasysh formën e mirë që po e dëshmon Prishtina në javët e fundit. Ferizaj është i mobilizuar për këtë ndeshje dhe kërkojmë vetëm fitore kundër Prishtinës. Vetëm mesfushori Shpend Gashi është në dyshim që të paraqitet për shkak të lëndimit, ndërsa kthehen dy mbrojtësit: Burim Shabani e Gramoz Tafaj.

Assesi nuk do të lejojmë që të na mposhtë Prishtina, por do të bëjmë përpjekje të fitojmë ndeshjen, kuptohet në mënyrë sportive dhe me lojë të mirë”, tha Sherif Topalli, futbollist i Ferizajt. Nga ana tjetër, Faton Zejnullahu, sulmues i Prishtinës, i cili në ndeshjen me Trepçën ka shënuar edhe golin e parë për kampionin në fuqi.

Ai pret të merr tri pikë me skuadrën e tij, të cilat pikë do të bëjnë me gjasa të fuqishme në mbrojtjen e titullit. “Prishtina është e përgatitur maksimalisht për sfidën me Ferizajn. Në Ferizaj do të luftojmë për fitore dhe shpresojmë se këtë do të arrijmë në fund të takimit. Do t’i zbatojmë urdhrat e kryetrajnerit Ramiz Krasniqit dhe të shënojmë rezultat pozitiv. Prishtina me përjashtim të Astrit Fazliut që është i lënduar, të tjerë futbollist janë të gatshëm.

Jam optimist se do të vazhdojë më formë të mirë dhe shënimin e golave me skuadrën e Prishtinës. Qëllimi jonë është t’i marrim tri pikë, të cilat na afrojnë drejt titullit të ri”, tha Zejnullahu. Kryesuesi i tabelës, Trepça nga Mitrovica, hiqet favorite kundër Drenicës, e cila po dëshmon lojëra të mira në javët e fundit.

KEK-u nga Kastrioti, ka shtuar apetitet që të luftojë për titull pas fitores javën e kaluar me rezultat 2:1 në Vushtrri kundër Kosovës. KEK-u pret Vëllaznimin e Gjakovës, e cila po bënë përpjekje me mish dhe me shpirt ta sigurojë ekzistencën. Kosova e Vushtrrisë ka udhëtimin më të vështirë në Pejë ndaj Besës.

Besa është në luftë për titull të kampionit dhe në krye me trajnerin e palodhshëm, Genc Hoxha, synojnë tri pikë. Gjilani në kërkim të pikëve të shpëtimi, do të jetë mysafirë i Hysit në Merdare, ndërsa Liria shpreson fitore ndaj Flamurtarit nga Prishtina, skuadër që po dëshmohet e fortë për secilin rivalë.

Raiffeisen Superliga

E diel

Ferizaj-Prishtina (S. Domi, B. Këpuska, I. Veseli)

Trepça-Drenica (E. Janovaliu, Z. Miranaj, M. Rrahimi)

Besa-Kosova (V) (P. Hasani, E. Baliqi, N. Ibrahimi)

KEK-u-Vëllaznimi (Z. Qorraj, S. Berisha, F. Jakupi)

Hysi-Gjilani (I. Shuleta, F. Brahushi, L. Muhadri)

Liria-Flamurtari (M. Ferati, A. Peshteri, J. Musolli). /botasot

Kapiteni i klubit të futbollit Besa nga Peja, Haxhi Zeka, është optimist se në Skenderaj do të arrijnë rezultat të favorshëm në përballje me Drenicën.

Zeka ka thënë se Besa do të ishte në pozitën e parë sikur mos të ishte dëmtuar nga gjyqtarët.

“Besa është skuadra më e dëmtuar në elitën e futbollit. Mund të them se nuk ka ndeshje që Besa nuk është dëmtuar nga gjyqtarët. Si në Mitrovicë që jemi dëmtuar, po ashtu jemi dëmtuar edhe në disa ndeshje të tjera dhe së fundi edhe në Pejë me Prishtinën. Gjyqtari në ndeshjen me Prishtinën nuk e gjykoi penallti në minutën e 90-të për Besën, që kjo ka qenë dëmtimi shumë i rëndë. Sikurse të ishte një gjykim më korrekt nga gjyqtarët dhe mos të dëmtohej Besa pothuajse në të gjitha ndeshjet, sot do të ishim kryesues i tabelës”, tha Zeka.

Sa i përket ndeshjes me Drenicën që zhvillohet të mërkurën në Skenderaj, në orën 15.00, shpreson në rezultat të favorshëm, megjithëse nuk janë edhe aq të disponuar pas humbjes me Prishtinën në Pejë.

“Nuk jemi aq të disponuar me humbjen që pësuan në Pejë nga Prishtina. Besoj se në Skenderaj do të nxjerrim rezultat të favorshëm nëse ka një referim korrekt nga gjyqtarët. Shpresat i kemi për titullin e kampionit sepse pesë pikë që është para nesh Trepça konsideroj se nuk është epërsi e madhe. Besa është e kompletuar dhe synon të kthehet me fitore. Si po fitojnë skuadrat të tjera në Pejë edhe ne dëshirojmë të fitojmë jashtë fushës sonë. Në Pejë të gjitha skuadrat luajnë sikurse në shtëpi të tyre sepse Peja ka traditë dhe ofron kushte për lojë për secilën skuadër”, tha Zeka.

Nga ana tjetër, futbollisti Sami Geci, e vlerëson si ndeshje të vështirë të mërkurën që do të kanë në ballafaqim me Besën.

“Është ndeshje e vështirë për ne sepse kemi një rival të fortë siç është Besa. Po ashtu fusha është e rënduar nga shiu që po bie pandërprerë, por shpresoj se deri të mërkurën gjithçka do të jetë në rregull. Drenica në pranverë po dëshmon lojëra të mira dhe kemi mposhtur rivalë edhe më të fortë se Besa, kështu që edhe në këtë takim presim fitore. Fitorja sadopak do të na shmang nga skuadrat e fundit të tabelës, por jo edhe të bëjmë gjumë të rehatshëm në vazhdim të kampionatit”, tha Geci.

Skuadra e Drenicës është në vendin e nëntë me 30 pikë, ndërsa Besa renditet e dyta në tabelën e klasifikimit me 36 pikë të grumbulluara. /botasot