Skuderia e Formula 1, Red Bull Renault, ka prezantuar bolidin e ri, RB8, me të cilin do të startojë në mbrojtjen e titullit të botës, si në konkurrencën e konstruktorëve ashtu edhe në atë të pilotëve.

Prezantimi i bolidit të ri është bërë në internet, vetëm një ditë para fillimit të testimeve në Jerez të Spanjës.

Me bolidin e mëparshëm, RB7, Red Bull dominoi në garat e Formula 1, ndërsa dy pilotët Sebastian Vettel dhe Mark Webber në vitin e kaluar regjistruan 12 fitore Grand Prix dhe i sollën Red Bullit titull të dyfishtë.

Çmimi i Madh i Valencias ishte gara e fundit e Botërorit të MotoGP të këtij viti. Menjëherë pas garës në qytetin spanjoll u zhvillua edhe ceremonia e ndarjes së cmimeve për fituesit e të tre kategorive.

Në kategorinë MotoGP, kampioni i botës u shpall Kejsi Stoner i cili arriti të fitojë edhe në garën e fundit duke mundur vetëm në momentet e fundit amerikanin e Jamahës, Ben Spis. Për Stoner ky ishte titulli i dytë botëror në MotoGP, pas atij të fituar në vitin 2007-n me Dukatin.

Në Moto2, trofeun e cmimit të pilotit më të mirë e mori pikërisht Shtefan Bradël. Piloti gjerman u shpall kampion bote në këtë kategori përpara zhvillimit të garës së Valencias për shkak të tërheqjes së rivalit të tij Mark Markez në momentet e fundit për arsye dëmtimi.

Në 125 kubikë, Nikolas Terol fitoi cmimin si piloti më i mirë i vitit. Piloti spanjoll u shpall kampioni i botës në këtë kategori pikërisht në garën e fundit duke përfituar edhe nga rrëzimi i rivalit të tij Zarkó.

Ceremonia e ndarjes së cmimeve për pilotët kampionë të Botërorit të MotoGP u mbyll me një homazh për pilotin italian Marko Simonçeli që u nda nga jeta në mënyrë tragjike përpara dy javëve në cmimin e Madh të Malajzisë.

Nico Rosberg kërkon që në vitin 2013 të pilotojë një Ferrari. 

Lajmin e bëjnë të ditur mediat gjermane të cilat saktësojnë se piloti i Mercedes me deklaratat në favor të Kokëkuqes po nervozon skuderinë e tij dhe brazilianin Felipe Massa, pilotin e Ferrarit që po i rrezikohet vendi nga rezultatet e pakënaqshme të këtij sezoni.

Nico Rosberg, djali i kampionit Keke Rosberg, hyri në Formula 1 me synimin për tu bërë një kampion, por progresi i tij në pistë ndaloi dhe këtë e tregojnë rezultatet. Rosberg renditet i shtati me 75 pikë, 23 pikë më pak se Massa dhe 5 pikë më shumë se shoku i tij i skuadrës, Michael Schumacher. Pikërisht për këtë arsye Ferrari nuk është i bindur nga piloti gjerman.

Skuderia italiane do të udhëtojë në Abu Dabi me disa ndryshime në aerodinamikë me qëllim përmirësimin e performancave në pistë. Skuderia italiane kërkon që të ndihmojë të paktën Alonson në arritjen e vendit të dytë në renditjen përfundimtare të pilotëve.

Tragjedia e Marko Simonçelit në Çmimin e Madh të Malajzisë në Botërorin e MotoGP, e ka prekur shumë Kolin Eduards, që ishte një prej protagonistëve të incidentit të ndodhur së bashku me Valentino Rosin. 

Në një intervistë për të përditshmen italiane “La Gazzetta Dello Sport”, Eduards shpjegoi arsyet e këtij aksidenti duke shtuar se nuk mund të bënte dot asgjë për ta shmangur atë.

“I kam bërë vetes një mijë pyetje. Cfarë do të kishte ndodhur nëse nuk do të bëja këtë aksident, nëse do të reagoja ndryshe? Por pashë fotot e incidentit  dhe e gjeta menjëherë përgjigjen; nuk mund të bëja dot asgjë për të shmangur atë që ndodhi”, thotë Eduards.

Më pas Eduards shtoi se as vetë Valentino Rosi nuk mund ta shmangte dot atë që ndodhi, ndërkohë që vlerësoi në maksimum Marko Simonçelin.

“Është shumë e vështirë për t’u pranuar humbja e një miku dhe kolegu. Marko ishte shumë i dashur nga tifozët për personalitetin, karakterin dhe karizmën e tij”, shton piloti i MotoGP.

Shumë duartrokitje dhe lot në funeralin e pilotit Marco Simoncelli në kishën e vendlindjes së tij, në Koriano.

Familjarët dhe miqtë e Simoncelli-t i dhanë lamtumirën e e fundit 24-vjeçarit, i cili humbi jetën në pistën e Sepangut në një aksident tragjik.

Në kishë ndodheshin edhe pilotë të njohur të motoçiklizmit si Valentino Rossi, Loris Capirossi, Randy de Puniet, Jorge Lorenzo dhe Sete Gibernau. Gjithashtu ishte i pranishëm Fausto Gresini (shefi i ekipit ku garonte Simoncelli) dhe përfaqësues të tjerë të Hondës.

Kufoma e “Supersic”, siç njihej në Itali, ishte e rrethuar nga djem me uniforma motoçiklistësh.

Shtatë herë kampioni i botës në Formula 1, Michael Schumacher, u shpreh i trishtuar për vdekjen e Dan Wheldon (më 16 tetor në një garë të Indy) dhe Marco Simoncelli.

“Masat e sigurisë janë rritur shumë me kalimin e kohës, por rreziku i aksidenteve të rënda ekziston ende. Ishte fat i keq dhe kundër fatit të keq nuk ke çfarë të bësh. Jam i prekur nga ajo që ndodhi, por fatkeqësisht duhet të them se kjo është jeta”, tha Schumi.

Nga ana e tij, ferraristi Fernando Alonso tha: “Dashuria për garat të bën që të mos shikosh rrezikun. E pashë aksidentin direkt në televizor dhe u trishtova shumë. Ne pilotët kemi ndjesinë se nuk jemi të rrezikuar dhe se jemi të pathyeshëm. Kur futemi në makinë mendojmë se nuk mund të na ndodhë asgjë, por kur ecën me 340 km/h je gjithmonë i rrezikuar.”

Trupi i pajetë i Marco Simoncelli, pilotit të Hondës i cili humbi jetën në një aksident tragjik në pistën e Sepangut (Malajzi), është kthyer ditën e martë në Itali. 

Shumë tifozë ishin mbledhur në aeroportin Fiumiccino të Romës për të pritur kufomën e 24-vjeçarit me thirrjet “Gladiatori”.

Më pas, trupi i tij është dërguar në vendin e tij të origjinës, në Korvino të Riminit.

I ati i pilotit të ndjerë, Paolo Simoncelli, deklaroi me mbërritjen në Itali: “Njerëzit po na qëndrojnë afër në këtë moment të vështirë dhe kjo është e mrekullueshme. Ata e dinë se çfarë djali ishte Marco. Thuhet se Zoti thërret më të mirët.”

Më pas, Paolo flet sërish për aksidentin: “Nuk ishte e mundur të shpëtohej sepse Marco kishte vdekur. Dua të falenderoj autoritetet malajziane, ambasadorin italian dhe djemtë e pistës së Sepangut sepse bënë një punë të jashtëzakonshme. Dua të falenderoj edhe qindra personat që lanë punët e tyre për të pritur dhe përshëndetur djalin tim.”

“Ai ishte një njeri i pastër dhe luftëtar. Mbase për këtë nuk është më midis nesh. Nëse do ta kishte lëshuar motorin, tani do ishte shëndoshë e mirë. E kisha mësuar të luftonte dhe të mos dorëzohej kurrë. Ndoshta kam bërë gabim”, shtoi i ati i Marco Simoncelli.

Ngasësi kosovar Gjergj Haxhiu ka katër vjet që garon në serinë karting, por ai nuk mban mend që në ndonjë nga këto gara të ketë mbetur jashtë podiumit fitues, madje as në garën e parë si 8-vjeçar.

Haxhiu, 12-vjeçar, po ecën me hapa të mëdhenj drejt asaj që synon – Furmula 1. Ai është kampion i padiskutueshëm i Zvicrës dhe nënkampion botëror (“WSK Master Series”) për grupmosha të reja.

Ai jeton në qytetin zviceran Lozanë, pasi familja e tij para 16 vjetësh emigroi në shtetin helvetik nga Prishtina.

Shtatë herë kampioni i botës në MotoGP, Valentino Rossi, hodhi poshtë zërat që flisnin për një tërheqje të tij të mundshme nga bota e sportit, pasi u përfshi në mënyrë të pavullnetshme në aksidentit ku humbi jetën piloti tjetër, Marco Simoncelli. 

”Doktori” i dha goditjen fatale 24-vjeçarit, duke e goditur me gomën e përparme në kokë. Impakti shkaktoi plagët fatale dhe bëri që kaska e Simoncelit të shkëputej dhe të fluturonte në pistë.

Ditën e diel, Simoncelli humbi kontrollin e motorit në daljen e një kthese dhe u rrëzua përpara motorit të Edwards e Rossit. Asnjëri prej tyre nuk e shmangu dot, por autopsia tregoi se plagët fatale kishin qenë ato të marra nga idhulli i tij.

”Për të gjithë ata që pyesin, Valentino nuk është duke menduar në asnjë rrethanë të tërhiqet nga MotoGP. Më vjen keq që qarkullojnë zëra të tilla të pavërtetë”, deklaroi një mik i afërt i motoçiklistit.

Ndërkohë, trupi i pajetë i Simoncelit do të mbërrijë në Itali mëngjesin e së martës, me një linjë direkte avioni. Ai do të shoqërohet nga babai, ndërsa nëna dhe e motra do ta presin në aeroportin e Romës. Homazhet do të kryhen të gjitha ditën e mërkurë, ndërsa ai do të varroset në një ceremoni që do të zhvillohet të enjten.

Tragjedi ne Moto GP. Një aksident i frikshëm në xhiron e dytë të Cmimit të Madh të Malajzisë në Moto GP i ka kushtuar jetën pilotit italian të Hondës, Marco Simoncelli.

Pamjet e aksidentit janë të frikshme: Simoncelli rrëzohet në pistë dhe në këtë kohë Colin Edwards nuk ka mundur ta evitojë duke i kaluar përsipër me motorrin e tij dhe duke e goditur në qafë.

Që në momentin e parë dukej se situata ishte kritike: 24-vjecari i shtrirë në asfalt pa lëvizur dhe me kaskën që i ishte hequr nga përplasja e fortë.

Doktori Marco Russo, në deklaraten për Italia 1, deklaroi se “Simoncelli arriti në spital me një arrest kardiak dhe shenjat e gomave në qafë”.

Marco Simoncelli po zhvillonte garën e tij të 149 në botëror. Është shpallur kampion bote në kategorinë 250 cc në vitin 2008 dhe që nga viti i kaluar garonte për Hondën në Moto GP.

Gara e Malajzisë u ndërpre menjëherë pas aksidentit dhe u pezullua përfundimisht disa minuta më pas, gjë që bëri të mendohej për më të keqen.

Babai Marco Simoncellit pret jashtë qendërs mjekësore pas një përplasje në Grand Prix të Malajzisë

Titulli i dytë kampion nuk ia ka ulur aspak ritmin Sebastian Fetelit, i cili në garën e Koresë sërish ka arritur të fitojë duke çuar në dhjetë numrin e sukseseve sezonale. 

Gjermani ka marrë vendin e parë që në fillimin e garës duke lënë pas Ljuis Hamilton dhe e mbajti atë deri në fund pa e diskutuar në asnjë moment. Në të njëjtën mënyrë edhe britaniku, i skuadrës McLaren ka arritur ta kalojë i dyti vijën e finishit pas një dueli të ashpër me pilotin tjetër të skuadrës Red Bull, Mark Veber i cili pavarësisht tentativave në disa raste nuk mundi të marrë vendin e dytë, duke mbyllur gjithçka në Kore me vendin e tretë.

Pas tyre një garë larg protagonistëve kanë zhvilluar piloti tjetër i McLaren-it Xhenson Baton dhe spanjolli i Ferrarit, Fernando Alonso i cili e kaloi finishin në vendin e pestë pa patur mundësinë për të bërë më mirë.

Në këtë mënyrë është mbyllur edhe gara e 16-të e këtij sezoni, ku skuadra Red Bull falë fitores së Sebastian Fetelit dhe vendit të tretë të Mark Veber arriti të shpallet edhe kampione për konstruktorë, duke i mbyllur objektivat 3 gara përpara fundit të sezonit.

Gara e radhës do të jetë Cmimi i Madh i Indisë më 30 tetor.