Kikboksieri nga Istogu, Besim Kabashi të shtunën në Munich të Gjermanisë ka fituar edhe titullin e peshës super të rëndë (+95 kg), pasi që ka fituar me nokaut në rundin e parë kundër italianit, Luca “Tigri” Panto.

Kabashi prej vitit 2008 ka qenë kampion i peshës deri 95 kg, ndërsa me këtë e ka shpallur veten kampion absolut i peshave të rënda në kikboks.

Pas rrëzimit në rundin e parë, Panto më nuk arriti të kthehet në luftë dhe u pajtua me humbjen, kurse Kabashi e qetësoi “tigrin” italian.

Kick-boksieri i mirënjohur shqiptar, Besim Kabashi, që mbron ngjyrat e kombëtares së Gjermanisë, ka mbajtur seminarin për garues dhe trajnerë të kick-box-it.

Ligjërimet e tija si dhe pjesa praktike që ka demonstruar në sallën e kick-box-it në Qendrën e Rinisë dhe të Sportit në Prishtinë, kanë qenë shumë domethënëse për garues dhe trajnerët. Edhe kryetari i Federatës së Kick-Box-it të Kosovës, Fatmir Makolli, është shprehur jashtëzakonisht i kënaqur me demonstrimet dhe ligjëratat që mbajti kick-boksieri i mirënjohur, Besim Kabashi. Makolli tha se ka qenë një seminarw shumë i rëndësishëm dhe aq më tepër edhe interesimi nga ana e garuesve ishte shumë i madh.

“Në seminarw morën pjesë një numër i madh i garuesve siç janë Ilir Menxhiqi, Yll Maliqi, Ilir Canolli, Elvis Gashi etj. po ashtu edhe shumë trajnerë të klube të ndryshme. Ata patën rastin të shohin përvojën e madhe që ka Kabashi në sferën ndërkombëtare dhe nga i cili mësuan njohuri të reja më moderne të këtij sporti atraktiv. Kabashi ka dëshmuar në praktikë shumë elemente të këtij sporti që ishte edhe një përvojë e mirë për garuesit dhe trajnerë. Federata e Kick-Box-it e Kosovës vazhdimisht bashkëpunon me Kabashin, por do të bashkëpunojë edhe më kick-boksierë të tjerë”, tha Makolli.

Federata e Kick-Box-it e Kosovës është e pranuar në Federatën e Kick-Box-it Ndërkombëtar.

“Çdo seminar që mbahet nga emrat e mëdhenj të kick-box-it sigurisht se do të jetë edhe shumë i frytshëm për ne”, tha Makolli. Koha e verës si zakonisht është edhe kohë pushimi. Mirëpo, zyrtarët e kësaj federate thonë se shpejti pritet të organizohet edhe një turne i kick-box-it në kryeqytet.

“Mundësitë janë që të organizohet edhe turneu ndërkombëtar në Prishtinë. Pritet këtë të bëjë Tahir Menxhiqi, një kick-boksier i shkathët dhe më përvojë të madhe. Interesim ka shprehur edhe televizioni më i fuqishëm në botë, Eurosport, që të vjen dhe të transmetojë meçin e tij. Megjithatë, nuk dihet saktë se kur mund të organizohet meçi i tij, por shumë shpejt do të bëjmë të ditur edhe datën e saktë”, tha Makolli. Kick-box-i një nga sportet më atraktiv premton rezultate më të mira në sferën ndërkombëtare.

Njëri prej kick-boksierëve më të mirë të Kosovës, Tahir Menxhiqi, i cili jeton dhe vepron në Holandë, do të jetë pjesëmarrës në garën e rëndësishme botërore “WorldMax 2010” në kick-box që mbahet në Tokio të Japonisë.

Ky eveniment mbahet me 5 korrik dhe Menxhiqi për herë të dytë merr pjesë në këtë garë. Menxhiqi me 5 korrik përballet me japonezin, Yukihiro Komiya. Tahir Menxhiqi në kategorinë 70 kg që garon në disiplinën K-1, shpreson se do të shënojë fitore. Menxhiqi është optimist se do të ia dalë të shënojë sukses të mirë në Tokio të Japonisë, megjithëse do të jetë konkurrencë shumë e fortë.

Menxhiqi vitin e kaluar pati marrë pjesë në këtë eveniment, por nuk pati sukses, garë e cila ishte mbajtur në Korenë Jugore. Kryetari i Federatës së Kick-Box-it të Kosovës, Fatmir Makolli, tha se pret Menxhiqi të prezantojë Kosovën sa më mirë.

“Është garë shumë e rëndësishme që mbahet në Tokio, por besojmë se Menxhiqi do të korrë rezultat jashtëzakonisht të mirë. Ai është mjaft mirë i përgatitur dhe është i vetmi sportist në Kosovë që merr pjesë në disiplinën e K-1 në profesionalizëm”, tha ndër të tjera Makolli.

Edhe këshilltari për sport i ministrit, Lutfi Haziri, Muharrem Sahiti, tha se është më rëndësi që një garues nga Kosova do të jetë pjesëmarrës në një garë të nivelit të lartë në Japoni. Sahiti beson se Menxhiqi nuk do të kthehet pa suksese. Ndërkaq, Afërditë Fazlija, zv.drejtore e Departamentit të Sportit të Kosovës, e vlerësoj lartë punën që e bënë Federata e Kick-Box-it të Kosovës. Sipas saj, rezultatet e dhjetëvjetëshit të fundit të këtij sporti janë për lakmi dhe tash po shënojnë edhe në profesionalizëm.

Përveç meçit të Menxhiqit, Makolli ka folur edhe për sukseset që kanë arritur në fundjavën që shkoi në kampionatin e hapur gjerman. Makolli tha se dy medalje të fituara në Gjermani pra një të artë dhe një të argjendtë janë fryt i punës. Medalje të artë fitoi Ilir Menxhiqi në kategorinë -60 kg në disiplinën K-1 rules dhe me të argjendtë ishte kthyer Myrvete Uka në kategorinë – 65 kg në disiplinën K-1 rules.

“Në Gjermani ka qenë garë shumë e fortë dhe morën pjesë mbi një mijë garues nga shtetet e ndryshme, ndërsa Kosova me tetë garues është prezantuar mjaft mirë, si rezultat i kësaj sollëm dy medalje”, ka thënë Makolli. /botasot

Kick-boksierët e kombëtares së Kosovës fituan dy medalje (një të artë dhe një të argjendtë) në turneun ndërkombëtar në Gjermani.

Garuesit tanë në secilën disiplinë dëshmuan cilësi të lartë.

Medalje të artë ka fituar Ilir Menxhiqi në kategorinë -60 kg në disiplinën K-1 rules. Menxhiqi dëshmoi mjeshtëritë e tija, duke mahnitur me cilësitë e tija më së një mijë shikues të tubuar në palestër. Ndërkaq, Myrvete Uka në kategorinë – 65 kg në disiplinën K-1 rules, ia doli të fitoi medaljen e argjendtë në një konkurrencë shumë të fortë.

Dy medalje që konsiderohet si sukses jashtëzakonisht i mirë i kombëtares së Kosovës. Edhe kick-boksierët të tjerë dhanë maksimumin në secilën disiplinë, por mbeten pa medalje. Kryetari i Federatës së Kick-box-it të Kosovës, Fatmir Makolli, ka thënë se Kosova është paraqitur me shtatë garues në turneun ndërkombëtar në Gjermani, por sipas tij, lanë përshtypje shumë të mira.

“Në këtë turne morën pjesë rreth 1000 garues nga shtete te ndryshme evropiane. Garuesit tanë arritën me sukses të prezantojnë Kosovën, duke fituar dy medalje: një të artë dhe një të argjendtë”, tha Makolli.

Vlora Dumoshi, drejtoresh e Drejtorisë për Kulturë, Rini dhe Sport në Komunën e Prishtinës, priti në një takim Xhavit Bajramin, kampion i Botës në Kick-Box.

Dumoshi uroi Bajramin për mbrojtjen e titullit të kampionit të Botës në versionin me prestigjioz të ISKA kundër ukrainasit Dimitri Bezus, duel i cili u mbajt më 8 maj të këtij viti në Prishtinë.

Ndërkaq, Xhavit Bajrami, falënderoi drejtoreshën e Kulturës, Rinisë dhe Sportit në Komunën e Prishtinës, për pritje, dhe për mbështetjen financiare që i është ofruar atij nga Komuna e Prishtinës, përkatësisht nga Drejtoria për Kulturë, Sport dhe Rini, për organizimin e këtij dueli.

“Ne si komunë kemi mbështetur dhe do të mbështesim edhe në të ardhmen sportin dhe sportistët, që shënojnë rezultate në arenën ndërkombëtare, sepse edhe kjo është një mënyrë shumw e mirë e prezantimit të shtetit më të ri të botës”, tha Dumoshi.

Në shenjë falënderimi për mbështetje kampioni i Botës në Kick-Box, Xhavit Bajrami, i dhuroi Drejtoreshës për Kulture, Rini dhe Sport, Vlora Dumoshit, një mirënjohje. Bajrami është kick-boksieri më i mirë shqiptar dhe që premton rezultate të reja gjatë këtij viti.

Kryetari i ISKA-së për Evropë, Fritz Exenbeger, ka thënë se më 8 maj në Prishtinë do të jetë ngjarje e madhe dhe adhuruesit do të kenë mundësinë të kënaqën me spektaklin e K-1 të Gladiatorëve.

Kampioni i botës (K-1 Nata e Gladiatorëve) në kategorinë e rëndë, në versionin e ISKA (International Sport Kickboxing Asociation), Xhavit Bajrami, me padurim pret që ta mbrojë titullin në kryeqytetin e Kosovës, në Prishtinë. Bajrami i motivuar si asnjëherë më parë ka thënë se ka njohuri për rivalin e tij, Chris Knowles , të cilin do ta ketë përballë më 8 maj në ring në palestrën e sportit “1 Tetori” në Prishtinë.

Bajrami më 21 nëntor të vitit të kaluar, po në Prishtinë, për herë të parë boksoi dhe e fitoi titullin në ballafaqim me kick-boksierin francez, Freddy Kemayo. “Kick-boksieri britanik, Chris Knowles , është shumë i qëndrueshëm, peshon 120 kilogramë dhe ka përvojë.

Ai është ndër më të mirët në kick-boxin britanik, megjithatë konsideroj se përvoja ime do të bëjë të veten dhe do të triumfoj ndaj këtij garuesi. Është hera e dytë që do të zhvilloj meçin në Prishtinë, megjithëse kam pasur ofertë ta zhvilloj meçin edhe në Rusi dhe në vende të tjera.

Ky meç kuptohet se do të jetë shumë i vështirë, por iu premtoj adhuruesve të shumtë se do të jap maksimumin në ring dhe do ta mbroj titullin e fituar vitin e kaluar në Prishtinë”, tha Bajrami. Kryetari i ISKA-së për Evropë, Fritz Exenbeger, ka thënë se më 8 maj në Prishtinë do të jetë një ngjarje e madhe dhe adhuruesit do të kenë mundësinë të kënaqën me spektaklin e K-1 Nata e Gladiatorëve.

“Më 8 maj do të jetë ngjarje e veçantë në Prishtinë. Xhavit Bajrami do të dalë në ring për ta mbrojtur titullin e kampionit në versionin ISKA. Bajrami është kampion aktual dhe ka potencial të fortë që ta mbrojë titullin. Mendoj se do të jetë meç shumë i fortë e cilësor.

Kick-boksieri Chris Knowles është mjaft i fortë dhe ka mposhtur edhe ish-rivalin e Bajramit, Freddy Kemayon. Kjo nënkupton më së miri se çfarë luftëtari i madh është dhe për çfarë rivali të fortë bëhet fjalë”, tha Exenbegeri. Në vazhdim kick-boksieri Bajrami tha se përgatitjet për këtë meç të rëndësishëm do t’i zhvillojë në Zvicër.

Ai thotë se pret fitore dhe do t’i gëzojë adhuruesit me titullin e ri. “Shpresoj se do të përgatitem në mënyrën më të mirë për meçin e tetë majit. Synimi im është të përgatitem sa më mirë, të arrij formën e duhur dhe të korr fitore”, theksoi Bajrami. Exenbeger, kryetar i ISKA-së, tha se herën e kaluar në Prishtinë shikueshmëria dhe mënyra e organizimit i kanë lënë përshtypje jashtëzakonisht të mirë.

Exenbeger tregoi se këtë vit do të mbahet edhe Kampionati i parë në kick-box për amatorë në versionin ISKA. Sipas Exenbegerit edhe përfaqësuesja e Kosovës do të jetë pjesëmarrëse në këtë kampionat botëror që do të zhvillohet në Spanjë. Përveç zhvillimit të meçit të Bajramit, në program do të jenë edhe pesë meçe të tjera të kick-boksit profesionist. Bajrami bëri të ditur emrat e kick-boksierëve të tjerë që do të dalin në arenën e K-1 Nata e Gladiatorëve.

“Në program janë edhe pese meçe profesioniste. Boksojnë pesë shqiptarë të tjerë: Blerim Rashiti, Shemsi Beqiri, Muhamet Hasani, Tefik Bajrami dhe Avni Kabashi. Përveç këtyre meçeve në program pritet të jenë edhe tri parameçe”, tha Bajrami. Organizatorët e kësaj ngjarjeje botërore shpresojnë se do të ndihmohen edhe nga institucionet e Kosovës, por edhe nga sponsorët e ndryshëm.

Presidenti i Republikës së Kosovës, dr. Fatmir Sejdiu priti Xhavit Bajramin, i cili mbrojti titullin e kampionit në versionin ISKA në kick-box, në meçin me Fredi Kemajo.

Presidenti e përgëzoi Bajramin për fitoren dhe i uroi suksese më të mëdha edhe në të ardhmen. Xhavit Bajrami ka fituar më parë edhe titullin Grand prix në version K1 në kick box.

Kick-boksieri Bajrami e falënderoi presidentin Sejdiun për pritje që i ka bërë dhe premtoj në vazhdimin e sukseseve në këtë sport atraktiv.

Bajrami të shtunën që e lamë pas, në Prishtinë, dëshmoi formë të mirë dhe me sukses mbrojti titullin e kampionit kundër francezit, Kemajo. /botasot

Xhavit Bajrami e mbrojti titullin e kampionit të botës (K-1) në kick-box në kategorinë e rëndë, në versionin e ISKA (International Sport Kickboxing Asociation).

Ai mposhti kick-boksierin e njohur francez, Freddy Kemayo. Bajrami kënaqi rreth 2000 adhurues të tubuar në Qendrën e Rinisë dhe të Sportit në Prishtinë.

Ky meç është zhvilluar në pesë runde dhe nga tre minuta. Bajrami paraqitet në ring me flamurin kombëtar dhe të Republikës së Kosovës. Para meçit u intonua himni i Francës, më pas i shtetit më të ri në botë, Republikës së Kosovës.

Në rundin e parë, Bajrami dhe Kemayo provokuan njëri-tjetrin me goditje. Bajrami tentoi disa herë që të zë në pozitë të pavolitshme francezin, por ky i fundit me dinakëri ruhej dhe sulmoi me disa goditje. Në rundin e dytë, kick-boksierët maten forcat në ring. Bajrami gjithnjë shikonte dobësitë e rivalit, ndërsa francezi kërkonte rastin e ndonjë gabimit eventual.

Në sekondat e fundit të rundit të dytë shpërtheu Bajrami, duke e zënë në pozicionin mat francezi. Më këtë rast Bajrami i dha goditje disa goditje të njëpasnjëshme, duke e dërrmuar rivalin. Kemayo në rundin e tretë ishte më sfidues, më provokues dhe disa herë tentoi të zë në befasi Bajramin. Gjyqtari Eksemberger lejoj në disa raste edhe disa gjeste provokuese te Francezit.

Në rundin e katërt Bajrami iu lëndua syri për shkak të goditjes me kokë dhe luftës së papastër të rivalit. Bajrami dëshmoi cilësitë e tija ndaj rivalit të njohur me nofkën “Kali i çmendur”. Në rundin e fundit, Bajrami pësoi disa goditje të fortë. Mirëpo, në vazhdim Bajrami mori kontrrollin, duke i dhënë disa goditje të mira rivalit.

Pas shumë hamendjeve gjyqtarët shpallën fitues Bajramin. Ministri i Sportit, Valton Beqiri, ia dorëzoi kurorën e kampionit të botës Bajramit. “Meçi ka qenë shumë i vështirë, për shkak se u përpoqa ta kryej më herët. Kështu që bëra disa gabime, por, megjithatë arrita fitore dhe ta mbrojë titullin e botës”, tha Bajrami

Xhavit Bajrami do të përballet me Freddy Kemayon në meçin për titullin e kampionit të botës në kick-box në versionin IKSA. Ai thotë se është në top-formë, ndërsa beson që do ta mbrojë titullin në duel me francezin.

Xhavit Bajrami të shtunën në Prishtinë do ta zhvillojë meçin e radhës ndaj francezit Freddy Kemayo. Në këtë meç ai do të mundohet ta mbrojë titullin e kampionit të botës në kick-box në versionin IKSA (International Kick-boxing Sport Asociation).

Bajrami thotë se është përgatitur maksimalisht për këtë meç dhe tregon se është në top-formë. “Xhentëlmeni” shqiptar pohon se ndihet krenar që këtë luftë do ta zhvillojë në Kosovë para bashkatdhetarëve të vet.

Sipas tij, Freddy Kemayo është shumë ‘eksploziv’ dhe i shpejtë në ring. Megjithatë, kick-boksieri kosovar beson thellë se do të triumfojë.

Express: Të shtunën në Prishtinë do të mundohesh ta mbrosh titullin e kampionit të botës në kick-box në versionin IKSA, në përballje me francezin Freddy Kemayo. Sa je përgatitur për këtë meç?
Bajrami: Pesë javë kam pasur përgatitje intensive. Përgatitjet kanë shkuar shumë mirë, do të thotë përgatitjet i kam kryer pa pësuar ndonjë lëndim. Kam pasur një grup njerëzish shumë të mirë dhe profesionistë të mëdhenj me të cilët kam stërvitur. Pra, përgatitjet kanë shkuar ashtu siç duhet. Kjo do të shihet të shtunën kur ngjitem në ring. Them kështu sepse jam në top-formë.

Express: Në cilin vend i keni zhvilluar përgatitje për këtë meç?
Bajrami: Stërvitjet i kam zhvilluar në Holandë dhe në klubin tim në Zvicër.

Express: Ke qenë këmbëngulës që meçin ndaj Freddy Kemayo ta zhvilloni në Kosovë dhe ia arrite qëllimit. Cilat janë arsyet që e more këtë vendim?
Bajrami: Dëshira ime e kahershme ka qenë që këtë meç ta zhvilloj në Prishtinë, para bashkatdhetarëve të mi. Unë kam lindur dhe jam rritur në Kosovë. Ndërsa 20 vite të karrierës sime i kam kaluar nëpër shtete të ndryshme, por më i ëmbël sesa vendi im nuk është asnjë shtet tjetër. Ndihem krenar që më ka ardhur shansi që këtë meç ta zhvilloj në atdhe. Tani i mbetet publikut kosovar që të më ndihmojë drejt fitores duke më përkrahur. Ndërsa unë premtoj se do ta jap maksimumin nga vetja ime.

Express: A e njihini kundërshtarin tuaj, francezin Freddy Kemayo?
Bajrami: Po e njoh mirë. Ka dhjetë vite që e njoh.

Express: Sipas jush, cilat janë tiparet dalluese të tij apo kualitetet e tij?
Bajrami: Freddy Kemayo gjatë këtyre viteve të fundit ka arritur suksese të mira. Është shumë ‘eksploziv’ dhe i shpejtë në boks. Mua më duhet të kem kujdes nga ai që prej fillimi. Pa dyshim se do të jetë një meç shumë i fortë.

Express: A beson se do të fitosh ndaj tij?
Bajrami: Patjetër. Jam shumë optimist. Por, po e përsëris edhe njëherë se më duhet të kem kujdes shumë të madh. Them i kujdesshëm në atë kuptimin që duhet shkuar i kujdesshëm që prej fillimi e jo në atë mënyrën duke e nënçmuar apo diçka ngjashëm. Megjithatë, unë jam përgatitur mjaftë mirë dhe besoj në talentin dhe vlerat e mia. Prandaj jam optimist se do të fitoj. Shpresoj edhe në përkrahjen e publikut tim.

Express: A mendon ta përfundosh meçin para kohe?
Bajrami: Jo, jo. Unë kurrë nuk nisem në atë mënyrë, duke shpresuar që meçin ta përfundoj para kohe. Do të ishte e rrezik i madh për mua, sikurse t’ia mësyja që meçin ta përfundoj para kohe. Nokautin nuk mundet ta dijë asnjë sportist se si vjen. Por, unë jam përgatitur maksimalisht për t’i zhvilluar pesë raunde. Nëse ndodh ta nokautoj, atëherë do t’i gëzohesha këtij fakti.

Express: Pas këtij meçi, cilat janë planet tua për të ardhmen?
Bajrami: Meçi i së shtunës do të jetë i katërti që zhvilloj dhe në këtë vit nuk dua të boksoj më. Unë dua të pushoj pak muaj, sepse të them të drejtën kam punuar shumë dhe jam pak i lodhur. Ndërsa më 27 mars të vitit që po vjen, sipas të gjitha gjasave, do ta zhvilloj meçin e radhës. Kam pasur edhe një ofertë për ta zhvilluar një meç më 30 janar, por e kam refuzuar sepse dua të pushoj.

Një javë para meçit për titull të kampionit të botës në versionin ISKA, francezi Freddy Kemayo ka deklaruar se e dëshiron titullin dhe se është përgatitur për këtë një kohë të gjatë.

Kemayo të shtunën e ardhshme në Prishtinë do ta sfidoj shqiptarin Xhavit Bajrami, që aktualisht është pronar i këtij titulli.

“Një kohë të gjatë e kam pritur rastin që të bëhem kampion i botës në ISKA dhe tashti mu ka dhënë ky rast dhe besoj se nuk do ta lëshoj. Kam gjasa shumë të mira që të bëhem kampion”, tha Kemayo.

“Nuk jam rrahur asnjëherë deri më tashti me Xhavitin, por e njoh mirë nga meçet e tija që i kam përcjellë në K-1.

Çdokush e njeh Xhavitin dhe e din se ai është shumë i fortë dhe një luftëtarë që ka teknik jashtëzakonisht të mirë”. Deri më tashti Kemayo i ka zhvilluar 63 meçe profesioniste, prej të cilave 48 i ka fituar dhe 15 i ka humbur. Kemayo në dhjetë meçet e fundit ka shënuar 8 fitore dhe 2 humbje. Nuk ka pësuar humbje në katër meçet e fundit.

“Unë nuk kam asgjë për të humbur si sfidues. Bajrami është kampion dhe i tërë presioni është tek ai, pasi që ai duhet të ruaj kurorën e kampionit.

Puna ime është që të jam sa më larg tij dhe ti shmangem luftës nga afërsia, duke tentuar që kohë pas kohe të sulmoj”, tha Kemayo.

Meçi Bajrami – Kemayo zhvillohet më 21 nëntor në ora 20:00 në palestrën e pallatit të Rinisë dhe Sporteve në Prishtinë.