Thomas Muller nuk e ka fshehur frustrimin e tij pas barazimit të Bayern Munichut në takimin e të shtunës ndaj Hamburgut.

Takimi në Imtech Arena përfundoi me rezultat 1-1, ndërsa bavarezët mbetën dy pikë prapa Borussia Dortmundit në tabelë.

“Te Bayerni duhet gjithmonë të fitojmë. Dhe sidomos nëse duam të bëhemi kampionë, duhet të fitojmë shumë ndeshje”, citonSportBild.de fjalët e Mueller.

Presidenti i Borussia Dortmundit, Hans-Joachim Watzke, ka konfirmuar se skuadra e tij mori 2 milionë euro hua nga rivali i Bundesligës, Bayern Munich, për të shpëtuar nga falimentimi.

Presidenti i Bayern Munichut, Uli Hoeness, gjatë një takimi me tifozët në Hamburg bëri të ditur se gjiganti bavarez i kishte dhënë Dortmundit para hua më 2003. Kurse Watzke e konfirmoi atë që kishte deklaruar Hoeness.

“Po, e konfirmoj huanë”, tha ai për të përditshmen Ruhr Nachrichten. Dortmundi ishte shumë pranë falimentimit në sezonet pas suksesit të tij në Bundesligë më 2002, e nga kriza doli në fillim të 2005-ës.

Dortmund është aktualisht kampion në fuqi në Bundesligë dhe lider me dy pikë më tepër se Bayern.

Borussia Dortmund është lideri i ri në Bundesliga, pas fitores prej 2-0 në transfertë te Nurnbergu, teksa presioni mbi përcjellësit vazhdon të rritet.

Dortmundi e dominoi sfidën edhe pse ishte relativisht e bllokuar në pjesën e parë, më shumë për shkak të kushteve të rënduara klimatike.

Sebastian Kehl në pjesën e dytë e kaloi në epërsi Dortmundin për 1-0, teksa Lucas Barrios dyfishoi epërsinë që ishte dhe rezultati përfundimtar i takimit (82’).

Me fitoren e katërt radhazi Dortmundi ka 43 pikë në vendin e parë, kurse në pozitën e dytë është Bayerni i Munichut së bashku me Schalken që kanë nga 40 pikë. Bayerni i shkon Hamburgut të shtunën, kurse Schalke pret Mainzin.

Edhe pse jemi në dimër dhe në mbarë kontinentin evropian mbizotërojnë temperatura të ulëta, në Bundesligë bën shumë ‘nxehtë’. Për herë të parë pas 20 vitesh, tri skuadrat e para në renditje kanë pikë të barabarta. Bayern Munich është lider falë golaverazhit më të mirë, por ngjitur me të janë Borussia Dortmund dhe Schalke. Kurse Borussia M’Gladbach është menjëherë pas tyre.

Bayern Munich, Borussia Dortmund dhe Schalke 04 kanë nga 37 pikë. Borussia M’Gladbach ka 36. Statistika që flasin vetë. Gara për titull në Bundesligë nuk mbahet mend kur ka qenë më interesante.

Treshja e përcjellësve kanë shfrytëzuar humbjen e Bayernit në ndeshjen e tij të parë të 2012-ës dhe tani vetëm një pikë i kanë katër ekipet e para në renditje. Kurse gjiganti bavarez është lider vetëm falë golaverazhit më të mirë. “Gjithmonë kemi thënë se nuk duhet të sigurohemi për asgjë”, tha drejtori sportiv i Bayernit, Christian Nerlinger. Gjendja aktuale në tabelë është shumë e rrallë, hera e fundit kur tri skuadra kishin pikë të barabarta në krye të tabelës pas fillimit të pjesës së dytë të sezonit ishte më 1991/92, plot 20 vite më parë. “Dortmund është rivali ynë më i madh”, shtoi Nerlinger, por theksoi se “M’Gladbach dhe Schalke janë po ashtu konkurrentë”.

Me të pajtohet edhe trajneri i Bayernit, Jupp Heynckess. “Rivali ynë më i madh është Borussia Dortmund, por nuk duhet nënçmuar as Schalken dhe Gladbachun”. Si zakonisht, Bayern është skuadër që deklaron ambiciet për titull, por rivalët janë të tërhequr sa i përket kësaj teme. Sulmuesi i Dortmundit, Kevin Groskreutz insistoi se fitorja e thellë 5-1 ndaj Hamburgut të dielën e kaluar ishte “mesazh për vetveten. Bayern mbetet favorit. Ne duhet të vazhdojmë të bëjmë punën tonë dhe të shohim në fund se ku jemi”. Këtë skenar e përcjell edhe sulmuesi tjetër i Dortmundit, Robert Lewandowski, i cili insistoi se renditja nuk ka rëndësi.

“Ne nuk jemi duke shikuar tabelën. Jemi duke u përqendruar në çdo ndeshje që na pret”. Më pak se 40 kilometra nga perëndimi, po thuajse askush në Schalke nuk ishte i përgatitur të fliste për titull. Madje vetë përmendja e kampionatit është tabu, thotë trajneri Hubb Stevens. “Nuk kemi vazhdimësinë e nevojshme”, tha ai. Mbrojtësi Benedikt Howedes shtoi: “Ne nuk duhet të matemi me Bayernin”, kurse bashkëlojtari i tij Christian Fucks theksoi: “Ne rival i Bayernit? Nuk është diçka që kemi thënë ne”.

Gladbach: Nuk kemi siguruar ende mbijetesën

70 kilometra më larg drejt veriperëndimit, M’Gladbach zyrtarisht ende lufton për mbijetesë, edhe pse me fitoren në javën e kaluar kundër Bayernit është shumë pranë kuotës së 40 pikëve, që gjithmonë garanton qëndrimin në ligë. “Deri më tani ne duhet të kalojmë këtë objektiv, e nuk kemi vendosur ende synime tjera. Titulli do t’i takojë Dortmundit ose Bayernit”, tha drejtori sportiv, Max Eberl. Pavarësisht fitores ndaj Bayernit, M’Gladbach refuzon të pranojë se është konkurrent për titull. “Ne mendojmë ndeshje pas ndeshjeje. Synimi ynë është të vazhdojmë të tubojmë pikë dhe të luftojmë për çdo pikë në çdo ndeshje”, insistoi trajneri Lucien Favre.

Schalke bëri zyrtarisht të ditur se ka nisur bisedimet me sulmuesin spanjoll, Raul, në lidhje me kontratën e re. Drejtori Sportiv i klubit, Horst Heldt tha se u takua fillimisht me përfaqësuesin e lojtarit, Gines Carvajal.

“Po, pata një bashkëbisedim të këndshëm”, tha Heldt për gazetën Bild, duke shtuar se në takim u shkëmbyen ide për vazhdimin e bashkëpunimit mes klubit dhe Raul.

Më herët është raportuar se Raul mund të largohet nga Schalke në fund të sezonit kur t’i skadojë kontrata, sepse klubi nuk është në gjendje të vazhdojë të plotësojë kërkesat për pagën e tij.

Drejtori sportiv i Schalkes, Horst Heldt, i ka mohuar fjalët se Jose Maria Gutierrez – Guti mund ta veshë fanellën e klubit nga Gelsenkirchen.

Që pas largimit nga Besiktasi në nëntorin e kaluar, 35-vjeçari është lojtar i lirë, ndërsa AS spekuloi se ai ka arritur marrëveshje me klubin ku luan ish-bashkëlojtari i tij te Real Madridi, Raul.

“Nuk është e vërtetë, nuk ka asgjë nga ajo (që thuhet)”, i ka thënë Heldt televizionit gjerman Sport1.

“Guti ka qenë futbollist i shkëlqyer, por asnjëherë nuk jemi interesuar për të”, ka shtuar ai.

Mesfushori i talentuar i Dortmundit, Mario Gotze, është lënë jashtë skuadrës që do të përballet me Hoffenhemin të dielën.

19 vjeçari ka vuajtur nga një problem së fundmi dhe Klopp ka konfirmuar për Sky Sports se lojtari nuk do të marrë pjesë në ndeshjen e radhës të ekipit kampion.

Ky lajm nuk është i mirë për Dortmundin pasi tash më shumë se kurrë verdh e zinjtë kanë nevojë për pikë, pasi janë barazuar në tabelë me Bayernin.

Borussia Dortmund rikthehet me mendësi fituesi në ndeshjen e parë të vitit 2012 duke shkatërruar 5-1 Hamburgun në transfertë, çka u lejon kampionëve të kapin në krye të klasifikimit Bayern Mynich dhe Schalke 04 me nga 37 pikë.

Grosskreutz hapi serinë e golave në minutën e 16 dhe më pas vijuan me nga një dygolësh Lewandowski e Blaszczykowski.

Goli i vetëm për vendasit erdhi në minutën e 86 nga Guerrero. Në takimin tjetër të ditës së dielë, Bayer Leverkusen mundi me vështirësi 3-2 Mainzin. Vendasit kaluan në avantazh të dyfishtë por më pas u arritën nga Mainz. Goli i Bender 20 minuta përpara fundit i dhuroi 3 pikët “aspirinave”.

Agjenti i lojtarit të Dortmundit, Robert Lewandowski, ka mohuar ndonjë kontakt me ndonjë përfaqësues të Bayernit të Munichut për një transferim të mundshëm gjatë janarit.

“Mes Bayernit dhe Lewandowskit nuk ka pasur ndonjë takim”, theksoi agjenti Maik Barthel.

Kohëve të fundit është spekuluar se Lewandowski mund të jetë lojtar i Bayernit, pasi kërkohet nga të gjithë te hierarkia bavareze.

Bayerni i Munichut ka pësuar humbje në transfertë te Borussia Monchengladbach me rezultat 3-1, duke filluar kështu keq pjesën e dytë të sezonit në Bundesliga.

Bayerni e filloi shumë keq këtë takim. Ishte i shumëkërkuari, lojtari i ardhshëm i Dortmundit, Marco Reus ai që shënoi i pari pas 11 minutash lojë për 1-0.

Epërsinë e dyfishoi Patrick Herrman me ndihmën e Mike Hankes në minutën e 41-të, që ishte dhe rezultati i pjesës së parë.

Në pjesën e dytë përsëri Patrick Herrman shënoi për 3-0 (71’), kurse golin e nderit për bavarezët e shënoi Bastian Schweinsteiger (76’), për 3-1 dhe rezultatin përfundimtar të këtij takimi.

Me këtë disfatë Bayerni ka 37 pikë në vendin e parë, përderisa Munchengladbach është në vendin e dytë me 36 pikë. Të shtunën Schalke dhe Dortmund kanë rastin për të barazuar pikët me Bayernin dhe për të bërë lidershipin e trefishtë në tabelën e Bundesligës.