Menaxheri i Manchester Unitedit, Sir Alex Ferguson, është trajneri më i mirë në botë i shekullit XXI, sipas Federatës Ndërkombëtare për Histori dhe Statistika në Futboll (IFFHS). Pas tij vijnë Arsene Wenger i Arsenalit dhe Jose Mourinho nga Real Madrid. Kurse Pep Guardiola është i 22-ti.

Menaxheri i Manchester Unitedit, Sir Alex Ferguson, kryeson klasifikimin e trajnerëve më të mirë në botë të shekullit XXI, renditje e bërë nga Federata Ndërkombëtare për Histori dhe Statistika në Futboll (IFFHS).

Strategu skocez është ‘kampion’ përballë homologëve. Rivali i tij nga Premierliga, menaxheri i Arsenalit, Arsene Wenger, renditet i dyti, kurse ‘podiumi’ kompletohet nga Jose Mourinho i Real Madridit. Befason pozita e strategut të Barcelonës, Pep Guardiola, i cili renditet i 22-ti.

Kryesimi i Fergusonit nuk është për t’u habitur. Ai udhëheq Manchester Unitedin nga viti i largët 1986, kurse nuk ka ndërmend të ndalet. Djajtë e Kuq sezonin e kaluar fituan titullin e tyre rekord të 19-të në Premierligë, duke u bërë skuadra më e titulluar në kampionatin anglez.

Pas treshes së parë vijnë selektori i Anglisë, Fabio Capello, trajneri holandez Guus Hiddink dhe trajneri i ri i Paris Saint-Germainit, Carlo Ancelotti. Më pas vijnë selektori i Spanjës, Vicente del Bosque dhe trajneri i Athletic Bilbaos, Marcelo Bielsa. Top 10-ta kompletohet nga trajneri i Palmeirasit, Luiz Felipe Scolari dhe spanjolli Rafael Benitez.

Renditja e trajnerit të shekullit XXI

1. Sir Alex Ferguson 166 pikë

2. Arsene Wenger 165

3. Jose Mourinho 154

4. Fabio Capello 135

5. Guus Hiddink 112

6. Carlo Ancelotti 108

7. Vicente del Bosque 104

8. Marcelo Bielsa 101

9. Felipe Scolari 101

10. Rafael Benítez 97

Liverpooli dhe Tottenhami janë kënaqur me nga një pikë në ndeshjen e fundit të javës së 24 në Ligën Premier.

Takimi i zhvilluar të hënën mbrëma në Anfiled përfundoi pa u prekur rrjetat e asnjërës skuadër.

Pas këtij takimi, Tottenhami mban pozitën e tretë në tabelë, me shtatë pikë më pak se lideri Manchester City.

Ndërkaq, Liverpooli gjendet në vend të shtatë me katër pikë më pak se pozita e katërt, të cilën e mban Chelsea.

Valon Behrami është një fenomen i futbollit. Kështu mendon mesfushori i Udineses Gelson Fernandes, i cili foli për ndeshjen e së dielës Fiorentina – Udinese, por nuk la pa e përmendur mesfushorin kosovar, i cili po shkëlqen në fanellën e klubit Viola.

“Ndoshta mund të duket një deklaratë anësore, sepse edhe unë jam zviceran si ai, mirëpo Behrami është një fenomen i jashtëzakonshëm. Këtë ma konfirmoi edhe sot. Është një vlerë shumë e rëndësishme për Fiorentinën, e cila mbështetet në të në aspektin e personalitetit dhe përgjegjësisë”, deklaroi Fernandes për ueb faqen italiane calciomercato.com.

Behrami e ndihmoi klubin nga Firenze ta mposhtë Udinesen me rezultat 3:2. Ish futbollisti i Veronës, i Lazios dhe i West Ham Unitedit ishte pranë transferimit në Juventus muajin e kaluar, por vendosi përfundimisht të qëndrojë tek ‘Viola’, sepse nuk deshi ta tradhtojë klubin i cili i besoi në momentet më të vështira të karrierës.

Thomas Muller nuk e ka fshehur frustrimin e tij pas barazimit të Bayern Munichut në takimin e të shtunës ndaj Hamburgut.

Takimi në Imtech Arena përfundoi me rezultat 1-1, ndërsa bavarezët mbetën dy pikë prapa Borussia Dortmundit në tabelë.

“Te Bayerni duhet gjithmonë të fitojmë. Dhe sidomos nëse duam të bëhemi kampionë, duhet të fitojmë shumë ndeshje”, citonSportBild.de fjalët e Mueller.

Presidenti i Borussia Dortmundit, Hans-Joachim Watzke, ka konfirmuar se skuadra e tij mori 2 milionë euro hua nga rivali i Bundesligës, Bayern Munich, për të shpëtuar nga falimentimi.

Presidenti i Bayern Munichut, Uli Hoeness, gjatë një takimi me tifozët në Hamburg bëri të ditur se gjiganti bavarez i kishte dhënë Dortmundit para hua më 2003. Kurse Watzke e konfirmoi atë që kishte deklaruar Hoeness.

“Po, e konfirmoj huanë”, tha ai për të përditshmen Ruhr Nachrichten. Dortmundi ishte shumë pranë falimentimit në sezonet pas suksesit të tij në Bundesligë më 2002, e nga kriza doli në fillim të 2005-ës.

Dortmund është aktualisht kampion në fuqi në Bundesligë dhe lider me dy pikë më tepër se Bayern.

Robin van Persie e ka lëvduar ndikimin e Alex Oxlade-Chamberlain te skuadra e Arsenalit gjatë kohës së shkurtër që po qëndron te ky klub, ndërsa ka kërkuar nga njerëzit që të jenë të durueshëm.

“Ai tashmë është një lojtar fantastik. Ai është vetëm 18 vjeç dhe është aq i ri”.

“Ai është i mirë me top- ai i ka të gjitha. Është i shpejtë, ka lëvizje, teknikë, mund të shënojë gol ose të japë asistin. Ai ka një të ardhme të shkëlqyer”, ka thënë holandezi për faqen zyrtare të Topçinjve.

Claudio Ranierit i ka dalë situata nga kontrolli dhe Interi i tij ka tubuar vetëm një pikë nga tri ndeshjet ne Serie A.

Largimi i tij në fund të sezonit është pothuajse i sigurt, kurse nga Franca vjen lajmi se selektori i Trekolorëve, Laurent Blanc, mund të emërohet trajner i ri i Nerazzurrëve. Blanc nuk pritet të vazhdojë postin e tij pas Euro 2012, kur edhe mund të jetë e lirë bankina e gjigantit milanez.

Interi duket i ‘sëmurë’, Blanc mund të jetë ‘doktori’. Nerazzurrët pas 21 xhirosh në Serie A janë në pozitën e pestë me nëntë pikë më pak se Juventus.

Seydou Keita, mesfushori i Barcelonës, i ka dhënë kualifikimin kombëtares së Malit duke shënuar 11-metërshin përcaktues ndaj Gabonit dhe duke e kaluar në gjysmëfinalet e Kupës së Kombeve të Afrikës. 

Kjo është hera e katërt në histori që Mali arrin në këtë fazë të këtij turneu dhe të mërkurën do të përballet me Bregun e Fildishtë.

Gaboni, një nga mikpritësit e Kupës së Afrikës së bashku me Guinenë Ekuatoriale, kaloi në avantazh me anë të Moulongui, por për Malin barazoi Diabate në minutën e 84 duke e çuar ndeshjen në shtesë.

Pas përfundimit të 30 minutave shtesë me rezultatin 1-1, ekipet iu drejtuan pikës së 11-metërshit dhe vetëm Aubameyang humbi penalltinë duke lejuar që Keita të kualifikonte kombëtaren e tj në goditjen e fundit.

Gana mund Tunizinë falë gabimit të portierit

Një gabim i portierit tunizian Aymen Mathlouthi në shtesë bëri që Gana të fitonte 2-1 dhe të arrinte për herë të tretë radhazi gjysmëfinalet e Kupës së Afrikës ku do të ndeshet me Zambian.

Në shtesë, gabimi i portierit Mathlouthi u shfrytëzua më së miri nga sulmuesi i Marseille, Andre Ayew dhe e gjithë puna e mirë e ekipit tunizian shkoi dëm.

Ndeshja ka qenë e ekuilibruar, me shumë pak ritëm e raste për gol. Gana shënoi e para që në minutën e dhjetë me anë të futbollistit të Lyon-it, John Mensah. Ndeshja u barazua në minutën e 42 nga Khelifa.

Gana e ka fituar katër herë Kupën e Afrikës (1963, 1965, 1978 dhe 1982), ndërsa në edicionin e kaluar arriti finalen ku u mund nga Egjipti.

Klubi nga Primera Divisioni spanjoll, Sevilla, i ka ndarë rrugët me trajnerin e deritanishëm Marcelino Garcia Toral, për shkak të rezultateve të këqija që e kanë lënë skuadrën në vendin e 11-të në tabelë.

Humbja nga Villarreali (që deri të dielën nuk kishte pasur asnjë fitore si mysafir), ka bërë që andaluzianët të vazhdojnë pa fitore në terren vendas që nga dhjetori.

Në një komunikatë të lëshuar nga Sevilla, thuhet se klubi ka vendosur ta shkarkojë Marcelinon “për shkak të rezultateve negative në shtatë ndeshje pa fitore, në të cilat janë fituar vetëm dy pikë”.

Nuk dihet se kush do ta drejtojë Sevillan, por mediat spekulojnë se trajneri i radhës mund të jetë ish-drejtuesi i Getafes, Michel.

Mesfushori i Romës, Daniele De Rossi, ka thënë se dashuria për klubin bëri që ai të vendosë për të nënshkruar kontratë të re.

Pas muajve të tërë me spekulime rreth të ardhmes së 28-vjeçarit, ai vendosi që të nënshkruante kontratë të re pesëvjeçare me Giallorossët.

“Ajo që më frymëzoi ishte pasioni për këtë skuadër dhe këta njerëz. E kuptova se kam krejt çka më duhet këtu”.

“Rruga e nënshkrimit të kontratës ishte paksa e gjatë dhe unë hezitoja. Kam dëgjuar mijëra njerëz të kenë thënë se ky ishte fundi (i qëndrimit tim këtu), por unë gjithmonë e kam ditur se do ta zgjidhja këtë”, citon Tuttosport fjalët e italianit.