Në American Airlines Arena, që të gjithë e kishin me nxitim, pasi për ekipin nga Florida ky ishtë I dyti vit radhazi që lojtarët e Miami Heat luajtën në shtëpi pikërisht ditën e Super Bowl-it.

Pasi kishte triumfuar plot 9 herë në 11 përballjet e fundit ndaj Toronto Raptors, skuadra e Erik Spoelstra-s e mori lehtë takimin dhe si rrjedhojë 12’ I parë u mbyll me një avantazh modest prej 4 pikësh në favor të ekipit vendas, I cili luajti pak a shumë në të njëjtën mënyrë edhe në vazhdimin e pjesës së parë duke shkuar në interval me rezultatin 53-48.

Miami shtoi ritmin në periodën e tretë dhe falë disa lojërave të mira të Chris Bosh e Dwyane Wade u shkëput ndjeshëm duke dhënë iluzionin e një fitoreje të lehtë. Të bindur se kishin bërë mjaftueshëm, Heat lëshuan ndjeshëm në lojë dhe në fakt shpesh kush nxiton gabon. Jerryd Bayless dribloi Mike Miller duke realizuar falë një depërtimi të thjeshtë pas të cilit ekipi kanadez kompletoi një break 12-0, që e çoi rezultatin 2’20” para fundit në 85-82. Bayless madje kishte në duar edhe mundësinë për të barazuar ndeshjen, por tentativa e tij për tre nuk gjeti retinën. LeBron u pa shpeshherë I nervozuar e duke u kërkuar llogari gjyqtarëve për të shpejtuar lojën, megjithatë “Mbreti James” më pas mori iniciativën dhe I zgjidhi gjërat ashtu siç di vetë, teksa rrëmbeu një top në gjysmëfushën e tij dhe pasi përshkoi gjithë parketin shkundi koshin e Raptors, pas një zhytje spektakolare me të dyja duart.

Përfundimisht Miami pas rezultati 95-89 siguroi fitoren e 6 radhazi ndaj Torontos dhe tashmë skuadra nga Florida shkon në 18 fitore dhe 6 humbje duke u shkëputur nga Philadelphia, gjithsesi Heat vazhdojnë ta shikojnë veten pas ekipit të Chicago Bulls që ruan vendin e parë në Konferencën e Lindjes me dy ndeshje më shumë. LeBron James e përfundoi takimin me 30 pikë, Wade me 25, ndërsa Chris Bosh duket se e kurseu ish-skuadrën e tij teksa u mjaftua me vetëm 12 pikë. Në krahun tjetër shënuesi më i mirë ishte DeMar DeRozan I cili realizoi 25 pikë, ndërsa Bayless dhe Kleiza e mbyllën sfidën me nga 17 pikë secili. Kjo ishte humbja e tretë në 4 ndeshjet e fundit për skuadrën kanadeze që vazhdon të jetë e gozhduar në pozicionin e fundit në Divizionin e Atlantikut. Në takimin tjetër ekipi i Boston Celtics fitoi brenda në TD Garden ndaj Memphis Grizzlies me rezultatin 98-80.

Fikret Hanxhiq luan për të dhjetin vit rresht në Kosovë. Nga lojtarët aktivë, Hanxhiq është basketbollisti me përvojën më të gjatë në skuadrën e Trepçës.

Ai është edhe basketbollisti i huaj me përvojën më të gjatë në Kosovë. Hanxhiq 30-vjeçar është nga Bosnja por ka vite që është edhe shtetas i Kosovës dhe për Trepçën luan si vendorë.

Ai Trepçës iu bashkua në vitin 2002. Nga “xehetarët” është larguar në disa raste, por nuk ka luajtur për skuadër tjetër. Qendra Hanxhiq (210 cm) synon që në përvjetorin e dhjetë në Kosovë, të fitojë titullin e kampionit.

Derrick Rose është këndellur vonë në ndeshje për t’i ndihmuar skuadrës së tij Chicago Bulls të shënojë fitore të ngushtë 105-102 ndaj New York Knicks në Madison Square Garden.

Knicks (8 fitore dhe 14 humbje këtë sezon) arritën të rikthehen nga disavantazhi prej 11 pikësh në mes të ndeshjes për të barazuar në 75-75 në çerekun e tretë, para se MVP i NBA-së të marrë situatën në duar për të shënuar 15 pikë në çerekun e katërt.

Rose shënoi gjithsej 32 pikë dhe 13 asistime në ndeshjen e mbrëmshme, derisa Carlos Boozer dhe Kyle Korver shënuan secili nga 16 pikë për Bulls, që tash kanë 19 fitore dhe gjashtë disfata.

Amar’e Stoudemire ishte më i spikaturi te skuadra vendase, New York Knicks, me 34 pikë, më të lartat në ndeshje, derisa Carmelo Anthony shënoi 26 pikë.

Me sfidën ndërmjet New York Knicks dhe Boston Celtics në Madison Square Garden ka filluar sezoni i ri në ligën më të fortë të basketbollit në botë- NBA.

Në këtë përballje, e cila ishte dramatike, sidomos në fund, fitores iu gëzuan Knicksat, me rezultat 106-104. Vendasit në çerekun e parë avancuan me 11 pikë, ndërsa dy çerekët e radhës u takuan mysafirëve, mirëpo në fund më të suksesshëm rezultuan basketbollistët e New York Knicks për të fituar me diferencë të ngushtë prej dy pikësh.

Nga ana tjetër, edhe Miami Heat ka fituar si mysafir i Dallas Mavericks me rezultat 105-94. Mysafirët ishin dominues në tre çerekët e parë të përballjes, ndërsa çereku i fundit i takoi skuadrës vendase, e cila megjithatë nuk arriti ta tejkalojë diferencën e lartë të krijuar në pjesët e mëparshme.

Edhe Chicago Bulls kanë arritur që me një pikë diferencë (88-87) të fitojnë në udhëtim kundër L. A. Lakers.

“Do të të vras!” Këto kanë qenë fjalët kërcënuese të Shaquille O’Neal ndaj Kobe Bryant gjatë një debati të nxehtë në dhomat e zhveshjes, kur mes dy basketbollistëve më të mirë të Los Angeles Lakers marrëdhënia ishte prishur. 

Këtë gjë e bën të ditur vetë Shaq në biografinë e tij me titull “Shaq Uncut: My Story” (Shaq pa censurë: historia ime) që do të dalë në shitje në datën 15 nëntor në Shtetet e Bashkuara të Amerikës.

Kërcënimi ka ndodhur para fillimit të sezonit 2003-2004 dhe Shaq ishte i nxehur për shkak të një interviste që Kobe Bryant kishte dhënë për mediat duke deklaruar se kolegu i tij ishte “i shëndoshë dhe aspak në formë”.

“Nëse do të thuash sërish diçka të tillë për mediat do të të vras!”, pati thënë një nga qendrat më të mira në historinë e NBA.

Shaq e konsideron në librin e tij Bryant-in si “fëmijë mburravec”.

Klubi i basketbollit Drita është përforcuar të hënën me lojtarin e huaj, Bojan Zllatkovski. Lajmin e ka bërë të ditur Federata e Basketbollit të Kosovës (FBK).

Basketbollisti maqedonas ka të drejt loje qysh në fundjavë, në ndeshjen e radhës të ekipit gjilanas, ndaj Futurës.

“KB Drita nga Gjilani paraqet për regjistrim lojtarin nga Maqedonia Bojan Zllatkovski. I njëjti ka të drejt loje që në xhiron e radhës, pas kryerjes së procedurës për regjistrim konform rregullores për regjistrim dhe licencim të FBK-së”, shkruan në njoftimin e FBK-së. Drita gjendet në pozitën e pestë në BKT Superligën e Kosovës në basketboll me 5 pikë.

Vitet e paraluftës, por edhe ato të pasluftës, kanë përcaktuar “katërshen e madhe” të basketbollit kosovar dhe me dështimin e një prej këtyre skuadrave, cilësia, por mbi të gjitha interesimi i tifozëve bie dukshëm, vlerësojnë udhëheqës të skuadrave që përbëjnë këtë katërshe. Stinorin e kaluar vetëm Prishtina dhe Peja ishin konkurrente për titull dhe Kupë nga kjo katërshe dhe njëra fitoi titullin, tjetra Kupën. Derisa dy skuadrat e tjera luanin një rol jo fort të zakonshëm për to. Trepça zuri vendin e katërt dhe të fundit në plejof, por pa ndonjë forcë për të bërë më shumë, kurse Bashkimi luftonte për mbijetesë.

Këtë stinor është më ndryshe, Trepça është organizuar, ka marrë dhe basketbollistë të huaj, njësojë siç ka bërë edhe Bashkimi duke u përforcuar me basketbollistë të vendit dhe të huaj, ndërkohë që Prishtina dhe Peja kanë vazhduar me “të vjetrën” – janë të forta.

Dhe, rezultatet janë të prekshme qysh në javët e para të stinorit të BKT Superligës, shprehet drejtori i Trepçës, Besim Braha, dikur lojtar kyç i kësaj skuadre. Palestra e Mitrovicës “Minatori” ishte e vogël për të zënë gjithë të interesuarit për të përcjellë ndeshjen me Sigal Prishtinën fundjavën që shkoi. Pak a shumë njësoj ishte edhe në derbin me Bashkimin në javën e parë. Dhe, për fatin e tifozëve mitrovicas, Trepça fitoi të dy këto ndeshje duke u “zhveshur” kështu nga roli i autsajderes që i përkiste sezonin e kaluar kur ndeshej me ekipet e mëdha si Prishtina e Peja.

“Për dallim nga viti i kaluar është dukshëm më mirë dhe ka interesim të madh të shikuesve për të përcjellë ndeshjet e basketbollit. Ne si kryesi e klubit kemi kontribuar shumë, pasi me pak mjete kemi arritur t’i sjellim dy përforcime që kanë dalë të qëlluara dhe kemi arritur që me organizim më të mirë të sjellim në palestër edhe shikuesit e shumtë”, thotë Braha. “Njëra ndër arsyet e kthimit të interesimit është edhe ardhja e përforcimeve të huaja, pasi ata janë përshtatur mjaftë mirë me ekipin dhe jemi të kënaqur me punën që po e bëjnë. Shikuesit duan që sa më shumë të ketë cilësi dhe mendojë që këtë vit cilësia është më e madhe. Në tri ndeshje që i kemi luajtur ne, lirisht them se na kanë përcjellë deri në 8.000 shikues. Interesimi është shumë i madh. Shpresojmë që edhe në ndeshjet e tjera të kemi numër të madh të shikuesve”.

Në fakt, pas Prishtinës, Trepça është skuadra më e trofeshme e pasluftës, me dy tituj dhe dy kupa të fituara. Prishtina ka plot tetë tituj e tetë kupa.

Drejtues të KB Bashkimi, po ashtu vlerësojnë se edhe ata kanë hise në këtë lëvizje pozitive. Sipas tyre, Bashkimi e ka vërtetuar edhe para dy-tri vitesh se mund të jetë “fitil” për të ndezur atmosferën në Kosovë.

Menaxheri i ekipit prizrenas, Arlind Kaçaniku, bëri të ditur që brenda dy ditëve ekipi do të përforcohet me dy basketbollistë të tjerë të huaj. Ata që ishin më parë u përcollën në mungesë të cilësisë së kërkuar.

“Gjatë këtyre ditëve do të përforcohemi me dy lojtarë të huaj, por nuk do të nxitojmë. Do të mundohemi të bëjmë zgjidhjen më të mirë për t’i kënaqur shikuesit dhe për të arritur rezultate sa më pozitive. Shikueshmëria është në nivel të kënaqshëm. Arsyeja se pse po ka shikueshmëri kaq të madhe në Prizren është se këtë vit organizimi është shumë i mirë. Dhe, shikuesit po kanë besueshmëri”, ka thënë Kaçaniku të hënën. “Kryesia ka kontribuar në konsolidimin e ekipit. Interesimi do të ishte edhe më i madh sikur të kishim rezultate më të mira. Kur shikuesit prizrenas shohin se po bëhet punë e mirë në klub, mezi presin të vijë dita e ndonjë ndeshje, pasi e duan sportin. Më shumë se 1.500 shikues kanë qenë prezent kundër Pejës, kjo tregon mjaft”.

Basketbolli i kosovar ka përjetuar shumë ulje-ngritje në këto 12 vitet e pasluftës, por kulmi i gjithë këtij rrëfimi mbetën stinorët 2002/03, 2003/04 dhe 2004/05, stinorë këta kur skuadrat merrnin edhe lojtarë që kishin bërë karrierë në NBA dhe Euroleague, shkruan sot “Koha Ditore”.

Xhiron e katërt të BTK Superligës së basketbollit në konkurrencën e meshkujve do ta karakterizojë ballafaqimi i rivalëve të vjetër, Trepçës dhe Sigal Prishtinës.

Ndeshja derbi do të zhvillohet nesër në pallatin “Minatori” në Mitrovicë prej orës 18:00 dhe pritet të mbledhë numër të madh të adhuruesve të kësaj loje, që do të rikthejnë rivalitetin por edhe interesimin e dikurshëm.

Palët tjera rivale të kësaj xhiroje janë: Futura – Peja (18:00) dhe Bashkimi – Drita (19:00), ndeshje të cilat zhvillohen të shtunën, dhe Kolegji UNIVERSI – KOSOVA (17:45), e cila zhvillohet të dielën.

Në vitet e para të pasluftës, gjatë ndeshjeve të basketbollit, disa herë janë thyer tabelat e koshit. Por asnjëherë nuk ka ndodhur që ndeshjet të anulohen për këtë arsye. Tabelat e thyera, sidomos pas ngulitjeve të fuqishme, janë zëvendësuar për punë minutash me tabela të tjera dhe ndeshjet kanë vazhduar.

Ndryshe qëndron situata tani. Në palestrën e sporteve në Vushtrri tabela e njërit kosh është thyer javë më parë, por ajo nuk është zëvendësuar ende. Sipas kompetentëve është e pamundur që të gjendet tabelë tjetër, ndërsa tabelë rezervë nuk kishte.

Kjo ka bërë që ndeshja e javës së tretë të BKT Superligës në mes Kosovës e Trepçës të shtyhet për “një termin të përshtatshëm”. Takimi ishte paraparë të luhet fundjavën e kaluar e më pas nga FBK-ja u njoftua që do të luhet të hënën. Por, ndeshja megjithatë nuk është luajtur ende.

Magic Johnson është pesonazhi i radhës i NBA që futet në listën e “armiqve” të LeBron James. 

Ish-basketbollisti i Los Angeles Lakers theksoi para studentëve të një universiteti amerikan se LeBron James, ylli i Miami Heat, nuk mund të krahasohet aspak me Kobe Bryant, yllin e Lakers.

“Gjithmonë do të ketë lojtarë të mëdhenj në NBA, gjithmonë do të ketë basketbollistë që do të fitojnë unazën e kampionit, përveç Lebron James”, tha duke qeshur Magic Johnson.

Kur iu kërkua të krahasonte dy lojtarët më të mirë të momentit në basketbollin amerikan (LeBron James dhe Kobe Bryant), ish-lojtari legjendar i Lakers tha: “Po bëni shaka? Bryant ka fituar tituj, ndërsa LeBron asgjë. Nuk ka krahasim këtu.”